छत्रपती शिवाजी महाराजांनंतर स्वराज्याची राजधानी असलेल्या ऐतिहासिक विशाळगड किल्ल्यावरील वाढत्या अतिक्रमणांविरोधात आता पुन्हा एकदा शिवप्रेमी आक्रमक होण्याची शक्यता निर्माण झाली आहे. विशाळगड अतिक्रमणमुक्ती संदर्भात आंदोलनाची पुढील दिशा ठरविण्यासाठी युवराज व माजी खासदार संभाजीराजे छत्रपती यांनी महत्त्वपूर्ण बैठक बोलावली आहे.
येत्या रविवार, दि. 7 जुलै रोजी येथील शासकीय विश्रामगृहात होणाऱ्या या बैठकीस राज्यभरातून दुर्गप्रेमी संस्था व शिवभक्त उपस्थित राहणार असल्याचे संभाजीराजे यांच्याकडून देण्यात आलेल्या प्रसिद्धिपत्रकात म्हटले आहे.
गडकोटांच्या संवर्धनासाठी सदैव प्रयत्नशील असणाऱ्या संभाजीराजे यांनी या विषयात पुढाकार घेऊन, विशाळगडास अतिक्रमण व धर्मांधतेच्या विळख्यातून मुक्त करावे, अशी राज्यभरातील अनेक शिवभक्तांनी पत्रव्यवहार, सोशल मीडिया व प्रत्यक्ष भेटून मागणी केलेली आहे. स्वतः संभाजीराजे यांनीसुद्धा दीड वर्षांपूर्वी विशाळगडावर प्रत्यक्ष भेट देऊन, पाहणी करून गडावरील अतिक्रमणे हटविण्यासाठी जिल्हा प्रशासनासोबत बैठक घेतली होती.
या बैठकीत गडावर पशुपक्षी हत्याबंदी लागू करण्याचे निश्चित झाले होते. तसेच तीन महिन्यांत गडावरील अतिक्रमणे हटविली जातील, असे आश्वासन तत्कालीन जिल्हाधिकारी राहुल रेखावार यांनी दिले होते. मात्र, स्थानिक राजकारण्यांनी आणलेला अडथळा व जिल्हा प्रशासनाची अकार्यक्षमता यामुळे ही कामे अर्ध्यातच बंद पडली. त्यामुळे गडावर पुन्हा एकदा अतिक्रमणे व धर्मांधता जोर धरू लागली आहे, असे छत्रपती संभाजीराजे यांनी आपल्या पत्रकात म्हटले आहे.
