शिवसेना (उद्धव बाळासाहेब ठाकरे)नेते, युवासेनाप्रमुख आदित्य ठाकरे रविवारी सिंधुदुर्ग दौऱ्यावर येत आहेत. महाविकास आघाडीचे अधिकृत उमेदवार वैभव नाईक यांच्या प्रचारार्थ रविवारी सायंकाळी 6 वाजता कुडाळ तालुक्यातील माणगाव बाजारपेठ येथे त्यांची जाहीर प्रचार सभा होणार आहे. या सभेसाठी महाविकास आघाडीचे सर्व पदाधिकारी, कार्यकर्ते व नागरिकांनी मोठ्या संख्येने उपस्थित रहावे, असे आवाहन शिवसेना जिल्हाप्रमुख संजय पडते यांनी केले आहे.
कुडाळ मालवण विधानसभा मतदारसंघाचे महाविकास आघाडीचे उमेदवार वैभव नाईक यांच्या प्रचारासाठी शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांची नुकतीच मालवण येथे जाहीर प्रचार सभा झाली. त्यानंतर उपनेत्या सुषमा अंधारे यांचीही प्रचार सभा कुडाळ येथे झाली. त्यापाठोपाठ शिवसेना नेते युवासेनाप्रमुख आदित्य ठाकरे सिंधुदुर्ग जिल्ह्यात येत असून ते जाहीर प्रचार सभा घेणार आहेत. या सभेचे नियोजन महाविकास आघाडीच्या वतीने करण्यात आले आहे. महाविकास आघाडीच्या कार्यकर्त्यांना मोठ्या संख्येने उपस्थित राहण्याचे आवाहन करण्यात आले आहे.
