सोशल मीडियावर रील बनवण्यासाठी आणि फेमस होण्यासाठी तरुणाई काय करेल याचा नेम नाही. तरुणाईच्या नको त्या धाडसामुळे अनेकदा त्यांना प्राणाला मुकावे लागते. अशीच एक घटना तेलंगणामध्ये उघडकीस आली आहे. साप तोंडात पकडून रील बनवताना सापाने दंश केल्याने एका तरुणाचा मृत्यू झाला आहे. सोशल मीडियावर हा व्हिडिओ व्हायरल होत आहे.
तेलंगणामधील शिवराज नामक यूट्यूबर रस्त्याच्या मधोमध उभा राहून तोंडात कोब्रा पडकून व्हिडिओ बनवत होता. मात्र त्याचा हा व्हिडिओ अखेरचा ठरला. व्हिडिओ बनवत असताना सापाने शिवराजला दंश केला. यात त्याचा मृत्यू झाला.
शिवराज आणि त्याचे वडील साप पकडून आणि सापांना मारून आपला उदरनिर्वाह करत होते. कोब्रा पकडल्यानंतर त्याच्या वडिलांनी सापासोबत व्हिडिओ बनवून त्याला व्हॉट्सअप ग्रुपवर टाकण्यास सांगितले. वडिलांच्या म्हणण्याप्रमाणे शिवराज कोब्रा तोंडात पकडून व्हिडिओ बनवत होता. मात्र व्हिडिओ बनवत असतानाच सापाने त्याला दंश केल्याने त्याचा मृत्यू झाला.
