मुंबई इमारत दुरुस्ती पुनर्रचना मंडळाचे सहमुख्य अधिकारी यांच्या दालनाबाहेर एका महिलेने पैसे उधळण्याचा प्रकार नुकताच घडला. याप्रकरणी म्हाडाचे उपाध्यक्ष संजीव जयस्वाल यांनी समिती गठित केली असून या समितीने 11 अर्जदारांची पात्रता तपासून त्यांना संक्रमण गाळे वाटपासंबंधीचा अहवाल पंधरा दिवसांत सादर करण्याचे निर्देश दिले.
कन्नमवार नगर संक्रमण शिबिरातील 12, 13 व 14 या चाळींमधील गाळे धोकादायक असल्याने पुनर्विकासासाठी सदर चाळीतील गाळय़ांच्या बदल्यात इतर संक्रमण शिबिरात पर्यायी स्थलांतर देण्याच्या मागणीसाठी 11 अर्जदारांनी अर्ज केला. याअगोदर या संक्रमण शिबिरातील धोकादायक चाळींमधील रहिवाशांना नवीन पुनर्रचित इमारतीत तात्पुरते स्थलांतरण देण्यात आले. सद्यस्थितीला 11 अर्जदार हे धोकादायक संक्रमण गाळय़ांमध्ये वास्तव्यास नाहीत. त्यामुळे सदर प्रकरण हे धोरणात्मक असल्याने त्याला वरिष्ठांची मान्यता आवश्यक होती. पूर्वी म्हाडामार्फत कार्यवाही करून संक्रमण शिबिरातील घुसखोरांचे गाळय़ांमधून निष्कासन केले होते, या पार्श्वभूमीवर अर्जदारांच्या अर्जाची पडताळणी आवश्यक आहे.
या 11 अर्जदारांना नवीन संक्रमण शिबीर का दिले गेले नसावे, याची पडताळणी होणे गरजेचे आहे. म्हाडा उपाध्यक्ष तथा मुख्य कार्यकारी अधिकारी स्तरावर याबाबत आदेश होणे आवश्यक असल्याने सदर प्रस्ताव पाठवण्यात आला. दरम्यान तक्रारदार महिला या स्वतः बाधित नसून त्यांनी प्रशासकीय यंत्रणेवर दबाव टाकण्याचा प्रयत्न केल्याचे म्हाडाने म्हटले आहे.
