श्री विठ्ठल रुक्मिणी मंदिराचे जतन आणि संवर्धनाचे काम युध्दपातळीवर सुरु असून या जीर्णोद्धार दरम्यान मंदिरातील देवाच्या जुन्या मेघडंबरीत काढून त्याठिकाणी नव्या मेघडंबरीत बसविण्यात आल्या आहेत. या नव्या मेघडंबरीत विसावलेले सावळ्या विठ्ठलाचे गोजिरवाणे रुप अधिक खुलले आहे.
श्री विठ्ठल रुक्मिणी मंदिरातील गाभार्‍यातील या मेघडंबरीसाठी 225 किलो चांदीचा वापर करण्यात आला आहे. आषाढी यात्रा एकादशीचा मुख्य सोहळा दि. 17 जुलै रोजी साजरा होत आहे. त्याअनुषंगाने दर्शनासाठी पंढरीत भाविकांची गर्दी देखील वाढू लागली आहे. वारीच्या निमित्ताने आलेल्या भाविकांना विठू माऊलीचे नवे रुपडे पाहायला मिळणार आहे. नवीन लाकडी मेघडंबरी ही ह.भ.प.विष्णू महाराज कबीर यांनी सेवाभावी तत्वावर विठ्ठलास 160 किलो वजनाची तर रुक्मिणी मातेस 110 किलो वजनाची देवू केली आहे. याचे मूल्य 30 लाख 50 हजार रुपये इतके आहे. त्या मेघडंबरीला मढविण्यासाठी एका दानशुर भक्ताने 2 कोटी रुपये किमंतीची 225 किलो चांदी दिली आहे. ही चांदी लाकडी मेघडंबरीवर मढविण्यात आली आहे.
श्री विठ्ठल रुक्मिणी मंदिर समितीने ठरलेल्या नियोजनानुसार आषाढी यात्रेपूर्वी म्हणजेच दि. 4 जुलै सायंकाळी गाभार्‍यात मेघडंबरी बसविण्यात आल्या आहेत. यावेळी समितीचे सह अध्यक्ष हभप गहिनीनाथ महाराज औसेकर, मंदिर समितीचे कार्यकारी अधिकारी राजेंद्र शेळके, व्यवस्थापक बालाजी पुदलवाड, सदस्य उपस्थित होते.
