महाराष्ट्रातील 14 कोटी जनतेला न्याय देण्यासाठी आणि प्रचंड बहुमत मिळाल्याने चौखूर उधळणाऱ्या सरकारला लगाम घालण्यासाठी विधानसभेत विरोधी पक्षनेत्याची नेमणूक करा, असा मुद्दा काँग्रेस विधिमंडळ नेते विजय वडेट्टीवार यांनी आज विधानसभेत मांडला. अधिवेशनाचे शेवटचे दोन दिवस उरले आहेत. संख्याबळ न पाहता विधानसभेत विरोधी पक्षनेत्याची नेमणूक व्हावी यावर त्यांनी जोर दिला.
विधानसभा कामकाज कार्यपद्धतीवर बोलताना विजय वडेट्टीवार यांनी हा मुद्दा मांडला. उपमुख्यमंत्री एकनाथ शिंदे म्हणाले की, सत्ताधारी आणि विरोधक ही विकासाची दोन चाके आहेत. मग यातील एक चाक असलेला विरोधी पक्षनेता सध्या सभागृहात नाही, असे वडेट्टीवार म्हणाले. महाराष्ट्रात संख्याबळाच्या आधारावर विरोधी पक्षनेत्याची नेमणूक होते अशी परंपरा नाही. त्यामुळे नवीन परंपरा पाडू नये, असेही ते म्हणाले. विधानसभा अध्यक्ष राहुल नार्वेकर यांनी यावेळी, सभागृहातील कामकाज हे नियमानुसार चालणार तसेच नियमानुसार नियुक्त्या करण्यात येतील, असे आश्वासन दिले.
विधानसभेचे कामकाज एकतर्फी होऊ नये. अधिवेशनाचे अंतिम आठवड्याचे काम विरोधी पक्षनेत्याची खुर्ची खाली ठेवून होऊ नये. अध्यक्षांना अधिकार आहे, त्यामुळे त्यांनी तातडीने निर्णय घ्यावा, असे वडेट्टीवार म्हणाले.
