मुंबईच्या छत्रपती शिवाजी महाराज टर्मिनल्सहून गोव्याच्या मडगाव स्थानकाकडे जाणारी वंदे भारत एक्स्प्रेस चक्क रस्ता चुकली आहे. देशातील सर्वात अतिजलद आणि अत्याधुनिक ट्रेन म्हणून वंदे भारतची ओळख आहे. ही ट्रेनच रस्ता चुकल्याने हा चर्चेचा विषय ठरत आहे.
ही ट्रेन सीएसएमटीहून गोव्याला निघाली होती. मात्र, रस्ता चुकल्याने ती कल्याणला पोहोचल्याची माहिती मिळाली आहे. त्यामुळे मध्य रेल्वेच्या काही गाड्या रखडल्या होत्या. तर वंदे भारतही नियोजित वेळेपेक्षा 90 मिनिटे उशाराने मडगावला पोहचली आहे.
सीएसएमटी पासून गोव्याच्या मडगाव स्थानकादरम्यान वंदे भारत एक्स्प्रेस चालवली जाते. ठाण्यामध्ये ही ट्रेन रस्ता चुकली ती दिवा स्थानकातून पनवेलकडे जाण्याऐवजी कल्याणच्या दिशेनं पुढे गेली. मात्र, चूक लक्षात येताच रेल्वे प्रशासनाने या वंदे भारत एक्स्प्रेसला कल्याण स्थानकात थांबवले. काही वेळानं ती पुन्हा एकदा गोव्याच्या दिशेनं रवाना झाली, रस्त्या चुकल्यामुळे या ट्रेनला मडगाव स्टेशनला पोहोचण्यासाठी तब्बल 90 मिनिटं उशिर झाला.
या ट्रेनला निर्धारीत मार्गानं दिवा स्थानकातून पनवेलकडे जायचे होते. मात्र ती कल्याणच्या दिशेनं पुढे गेली. ही घटना सकाळी सहा वाजून दहा मिनिटांच्या आसपास घडली आहे. मध्य रेल्वेचे जनसंपर्क अधिकारी स्वप्निल नील यांनी दिलेल्या माहितीनुसार हा सर्व प्रकार सिग्नल यंत्रणेमध्ये निर्माण झालेल्या गडबडीमुळे झाला.दिवा जंक्शनच्या डाउन फास्ट लाईन आणि पाचव्या लाईनमधध्ये असलेल्या एका सिग्नलमध्ये आणि दूरसंचार प्रणालीमध्ये तांत्रिक बिघाड झाला होता,अशी माहिती जनसंपर्क अधिकाऱ्याने दिली आहे.
