महाकुंभमेळ्यात मौनी अमावास्येच्या पर्वासाठी देशभरातून कोटय़वधी भाविक अमृतस्नानाकरिता दाखल झाले. भक्तीचा महापूरच या अद्भुत क्षणी संगम तटावर उसळला. मात्र मुख्यमंत्री योगी आदित्यनाथ यांची अख्खी यंत्रणा केवळ व्हीव्हीआयपींच्या सेवेत गर्क राहिली. मध्यरात्री दोन वाजण्याच्या सुमारास अमृतस्नानाचा ब्रह्ममुहूर्त साधण्यासाठी भाविकांची एकच झुंबड उडाली. यावेळी प्रचंड रेटारेटी, चेंगराचेंगरी होऊन 30 भाविकांचा मृत्यू झाला, तर शंभरहून अधिक भाविक जखमी झाले. मौनी अमावास्येला घात झाला आणि अमृतस्नान ‘मृत’स्नान ठरले. शेकडो भाविकांच्या आक्रोशाने गंगेच्या संगमाचा अक्षरशः थरकाप उडाला. जिकडेतिकडे विखुरलेल्या चपला, बूट, कपडे, इतर सामान आणि आप्त गमावलेल्या भाविकांचा काळीज पिळवटून टाकणारा आक्रोश, हंबरडा… असे भयाण चित्र होते.
पोलीस आयुक्त म्हणाले… भगदड मचने की संभावना है आणि…
गंगातटावर हजारो भाविक झोपले होते. तेव्हा ‘यहाँ लेटे रहनेसे कोई फायदा नही है. जो सोवत है, सो खोवत है. उठीये, उठीये स्नान करिए. ये आपके सुरक्षा के लिए कह रहे है. अभी बहुत सारे लोग आ रहे है. भगदड मचने की संभावना है. आप पहेले आ गए है तो सबसे पहले आपको अमृत मिलना चाहिए’ अशी उद्घोषणा पोलीस आयुक्त विजय पंत यांनी केल्यानंतर चेंगराचेंगरी झाल्याचे सांगितले जात आहे.
17 तास मौन
तब्बल 17 तासांनंतर मृत व जखमींचा आकडा जाहीर करण्यात आला. सायंकाळी 6.30 वाजता पोलीस उपमहानिरीक्षक वैभव कृष्णा आणि कुंभमेळा अधिकारी विजय किरण आनंद यांनी केवळ 3 मिनिटांची पत्रकार परिषद घेतली.
व्हीआयपी कल्चरला लगाम घाला
अत्यंत ढिसाळ व्यवस्थापन आहे. सामान्य भाविकांऐवजी सगळी यंत्रणा व्हीआयपींच्या दिमतीला ठेवली गेली आहे. त्यामुळेच ही भीषण दुर्घटना घडली. अजून महाकुंभमेळा बराच काळ चालणार आहे. आता तरी सरकारने व्यवस्था सुधारावी. व्हीआयपी कल्चरला लगाम घालावा. – राहुल गांधी, लोकसभेतील विरोधी पक्षनेते
