उत्तरप्रदेशातील बागपतमध्ये मंगळवारी एक मोठी दुर्घटना घडली आहे. भगवान आदिनाथांच्या निर्वाण लाडू महोत्सवादरम्यान लाकडी मचाण कोसळून झालेल्या अपघातात 7 भाविकांचा मृत्यू झाला आहे.यामध्ये दोन महिलांसह सात पुरुषांचा समावेश आहे तर 50 हून अधिक भाविक जखमी झाले आहेत.
बागपतमधील भगवान आदिनाथांच्या निर्वाण लाडू महोत्सवानिमित्त मंगळवारी सकाळी बरौत येथील श्री दिगंबर जैन पदवी महाविद्यालयाच्या परिसरात 65 फूट उंच लाकडी मचाण कोसळल्याने सात भाविकांचा मृत्यू झाला आणि सुमारे 50हून अधिक जण जखमी झाले. ही घटना 28 जानेवारीला सकाळी 8 वाजता घडली. त्यामुळे घटनास्थळी चेंगराचेंगरी झाली. सध्या घटनास्थळी बचाव कार्य सुरु आहे.दुर्घटनेवेळी झालेल्या चेंगराचेंगरीत 6 ते 7 पोलीसही जखमी झाले आहेत. जखमींची संख्या वाढण्याची शक्यता वर्तविण्यात आली आहे. सध्या बचावकार्य सुरू असून घटनास्थळी वरिष्ठ पोलिस आणि प्रशासनाचे अधिकारी उपस्थित आहेत.
अतिरिक्त जिल्हा दंडाधिकारी पंकज वर्मा यांनी आतापर्यंत सात जणांच्या मृत्यूची पुष्टी केली आहे. प्रशासनाने या प्रकरणाची चौकशी करण्याचे आदेश दिले आहेत. उपविभागीय दंडाधिकारी मनीष कुमार यांनी दोषींवर कठोर कारवाई केली जाईल आणि जखमींना सर्वतोपरी मदत केली जाईल असे सांगितले आहे. जखमींना तातडीने रुग्णालयात नेण्यात येत आहे. डीएम अस्मिता लाल आणि एसपी अर्पित विजयवर्गीय रुग्णालयांमध्ये पोहोचून जखमींकडून माहिती घेण्याचा प्रयत्न करत आहेत.
