■ अजय गायकवाड
आपल्या जादुई तबला वादनाने संपूर्ण जगाला भुरळ घालणारे उस्ताद झाकीर हुसेन यांच्या निधनानंतर आता विविध आठवणींनी ‘ताल’ धरला आहे. त्यांचे चाहते कर्जतमध्येदेखील होते. एका खासगी मैफलीसाठी ते काही वर्षांपूर्वी आले असताना तेथील स्थानिक कारागिराने बनवलेल्या तबल्याच्या हुसेन हे प्रेमातच पडले. त्यांना तो तबला एवढा आवडला की, परत जाताना सोबत तो तबला घेऊन गेले. कर्जतमधील रसिकांच्या मनात झाकीर हुसेन आणि त्या तबल्याच्या आठवणी अजूनही ताज्या आहेत.
कर्जतमधील संगीत रसिक रवी आरेकर व झाकीर हुसेन यांची चांगली मैत्री होती. काही वर्षांपूर्वी उस्ताद रवी आरेकर यांच्याकडे आले होते. तबल्याचा बादशहा आल्याचे वृत्त तबला कर्जतमधील चाहत्यांना समजताच सर्वांची पावले आरेकरांच्या घराकडे वळली. आज संध्याकाळी आपण मैफल करूया, अशी गळ आरेकरांनी घातली आणि झाकीरभाई तयार झाले. मग तबल्याची चाचपणी सुरू झाली. पण झाकीर यांना हवा तसा तबला नव्हता. त्यामुळे त्यांनी दुसरा तबला कुणाकडे मिळेल का, अशी विचारणा त्यांनी आरेकर यांच्याकडे केली. आरेकरांनी रात्रीच्या वेळी शोध घेण्यास सुरुवात केली. कर्जतमध्ये तबला बनवणारे विजय हरिश्चंद्रे यांचे घर आरेकर यांनी गाठले.
मी पैसे देतो.. पण तबला मला द्या!
हरिश्चंद्रे यांचे कर्जतमध्ये तालवाद्य बनवण्याचे दुकान होते. आरेकर यांनी झाकीर हुसेन यांच्यासाठी तबला मिळेल का, अशी विचारणी केली. त्यांनी लगेच एक चांगला तबला दिला. पण हा तबला विकला गेला असून मैफल संपल्यानंतर पुन्हा आणून द्या, असे सांगायलाही ते विसरले नाहीत. झाकीरभाईंना तो तबला आवडला. तोच त्यांनी मैफलीत वाजवून रसिकांची मने जिंकली. तो तबला मला द्या, ज्याने तो विकत घेतला आहे त्याला मी पैसे देतो असेही सांगितले व तबला झाकीर हुसेन आपल्यासोबत घेऊन गेले.
‘ते’ बोल अजूनही घुमतायत
ज्यांनी हा तबला आधी विकत घेतला होता त्या रघुनाथ दगडे यांना ही बाब समजली तेव्हा त्यांनाही आनंद वाटला आणि आपली काही हरकत नाही असेही सांगितले. झाकीरभाईंच्या निधनानंतर कर्जतकरांच्या मनात उस्तादांनी वाजवलेल्या तबल्याचे बोल अजूनही घुमतच आहेत.
