छत्रपती शिवाजी महाराज 100 टक्के सेक्युलर – नितीन गडकरी

nitin-gadkari

छत्रपती शिवाजी महाराज हे 100 टक्के सेक्युलर होते, असे वक्तव्य केंद्रीय मंत्री नितीन गडकरी यांनी केले आहे. प्रसिद्ध कादंबरीकार विश्वास पाटील यांनी लिहिलेल्या दोन इंग्रजी पुस्तकांचा प्रकाशन सोहळा गडकरी यांच्या हस्ते झाला. द वाईल्ड वॉरफ्रंट असे यातील एका पुस्तकाचे नाव आहे, यावेळी नितीन गडकरी यांनी आपली मते मांडली. छत्रपती शिवाजी महाराजांचा राज्य कारभार कसा चालत असे यावरही त्यांनी भाष्य केले.

छत्रपती शिवाजी महाराजांचे चरित्र इंग्रजी भाषेत येत आहे. याचा मला खूप आनंद होत आहे. महाराजांचा इतिहास. कार्य आणि कर्तृत्व याबाबत महाराष्ट्राबाहेरच्या लोकांमध्ये अनेक गैरसमज होते. लहानपणापासून आमच्या आईवडिलांहूनही जास्त स्थान आमच्या हृदयात ज्यांच्याबाबत होते त्या व्यक्तीचे नाव छत्रपती शिवाजी महाराज असे आहे, असे नितीन गडकरी म्हणाले. आजकाल सेक्युलर हा शब्द खूप प्रचलित आहे. या शब्दाचा अर्थ इंग्रजी डिक्शनरीत धर्मनिरपेक्षता असा दिलेला आहे. परंतु, या शब्दाचा अर्थ सर्वधर्मसमभाव असा आहे असे नितीन गडकरी म्हणाले.

अफझल खानाची कबर बांधण्याचे आदेश महाराजांनी दिले

एक राजा म्हणून छत्रपती शिवाजी महाराजांनी केलेले कार्य उत्तमच होते. अफझल खान आणि छत्रपती शिवाजी महाराज यांची प्रतापगडावर भेट झाली. खानाने छत्रपती शिवरायांवर वार केला. त्यानंतर महाराजांनी खानावर वार केले. यात अफझल खानाचा मृत्यू झाला. त्यानंतर शिवाजी महाराजांनी अफझल खानाची कबर प्रतापगडाच्या पायथ्याशी बांधण्याचे आदेश दिले, असे नितीन गडकरी यांनी सांगितले.