महिलांच्या सुरक्षेचा प्रश्न दिवसेंदिवस गंभीर बनत आहे. राज्यात सर्वच घटक असमाधानी आहेत. भयमुक्त वातावरण हवे असेल तर महाविकास आघाडीशिवाय पर्याय नाही. त्यामुळे महाविकास आघाडीला साथ द्या आणि विधानसभा निवडणुकीत विजयी करा, असे आवाहन महाराष्ट्र राज्य भारत जोडो अभियानाच्या समन्वयक उल्का महाजन यांनी केले. महाविकास आघाडीचे शिवसेना (उद्धव बाळासाहेब ठाकरे) पक्षाचे कल्याण पश्चिमचे उमेदवार सचिन बासरे यांच्या प्रचारासाठी आयोजित मेळाव्यात त्या बोलत होत्या.
कल्याणच्या गीता हॉल येथे मेळावा झाला. यावेळी बोलताना उल्का महाजन यांनी सत्ताधाऱ्यांच्या कारभारावर तीव्र नाराजी व्यक्त केली. ज्या राज्यात महिला, बालके, कष्टकरी यांच्यावर अन्याय होतो तेथील सत्ताधाऱ्यांना सत्तेवर राहण्याचा अधिकार नाही. राज्यात महिलांवर अत्याचार वाढत आहेत. महिलांच्या सुरक्षेसाठी महाविकास आघाडीची सत्ता आवश्यक असल्याचे मत त्यांनी व्यक्त केले. महिलांच्या शिक्षण, रोजगार आणि सुरक्षिततेच्या दिशेने महत्त्वपूर्ण योजना राबवण्याचे आश्वासन महाविकास आघाडीने दिले आहे. महिलांच्या सुरक्षिततेसाठी ठोस धोरण निवडणूक अजेंड्याचा केंद्रबिंदू असल्याने राज्यात सत्ता परिवर्तन होईल, असा विश्वासही उल्का महाजन यांनी व्यक्त केला. कल्याणसह पश्चिममध्ये सचिन बासरे यांच्या नावासमोरील मशाल चिन्हाचे बटन दाबून त्यांना विजयी करा, असे आवाहनही त्यांनी केले.
