रशिया आणि युक्रेनमध्ये सुरू असलेल्या युद्ध रोखण्यासाठी पुन्हा एकदा अमेरिकेने पुढाकार घेतला आहे. व्हाईट हाऊसमध्ये अमेरिकेचे राष्ट्राध्यक्ष डोनाल्ड ट्रम्प आणि युक्रेनचे राष्ट्राध्यक्ष व्लोदीमीर झेलेन्स्की यांच्यात खडाजंगी झाली होती. त्यानंतर पहिल्यांदाच शांततेसाठी अमेरिका आणि युक्रेनच्या अधिकाऱ्यांमध्ये सौदी अरेबियामध्ये मंगळवारी महत्त्वपूर्ण बैठक पार पडली. या बैठकीमध्ये अमेरिकेने दिलेला 30 दिवसांच्या युद्धविरामाचा प्रस्ताव युक्रेनने मान्य केला आहे. झेलेन्स्की यांनीच याबाबत माहिती दिली. डोनाल्ड ट्रम्प यांनीही याचे स्वागत केले आहे.
‘हे एक सकारात्मक पाऊल असून याचा स्वीकार करण्यास युक्रेन तयार आहे. आता अमेरिकेची जबाबदारी आहे की त्यांनी रशियालाही यासाठी राजी करावे. मॉस्कोनेही यास मान्यता दिल्यानंतर तात्काळ युद्धविराम लागू केला जाईल’ असे युक्रेनचे राष्ट्राध्यक्ष व्लोदीमीर झेलेन्स्की म्हणाले.
‘युक्रेनने युद्धविरामाला होकार दिला आहे. आता आम्ही रशियाला जाऊ आणि आशा आहे की राष्ट्राध्यक्ष व्लादीमीर पुतीनही यासाठी राजी होतील. शहरांमध्ये स्फोट होत असून लोक मरत आहेत. युद्ध लवकर संपावे अशी आमची इच्छा आहे’, असे डोनाल्ड ट्रम्प पत्रकारांशी बोलताना म्हणाले.
सौदी अरेबियामध्ये बैठक
अमेरिका आणि युक्रेनच्या अधिकाऱ्यांमध्ये सौदी अरेबियातील जेद्दाह येथे एक महत्त्वपूर्ण बैठक पार पडली. या बैठकीमध्ये युद्धविरामासह दीर्घ पल्ल्याच्या क्षेपणास्त्र हल्ल्यांना रोखण्यासाठी आणि युद्धात पकडलेल्या कैद्यांच्या मुक्ततेवर चर्चा झाली. या बैठकीचा मुख्य उद्देश रशिया-युक्रेनमध्ये सुरू असलेले युद्ध संपुष्टात आणण्यासाठी कुटनितीक तोडगा काढणे होता. अमेरिकेच्या परराष्ट्रामंत्री मार्को रुबियो, ष्ट्रीय सुरक्षा सल्लागार माइक वॉल्टज हे या बैठकीला उपस्थित होते.
दरम्यान, 28 फेब्रुवारी रोजी व्हाईट हाऊसमध्ये डोनाल्ड ट्रम्प आणि व्लोदीमीर झेलेन्स्की यांच्यात बैठक झाली होती. ही बैठक अत्यंत तणावात पार पडली. कॅमेऱ्यासमोरच दोन्ही नेते एकमेकांना भिडले होते. यानंतर अमेरिकने युक्रेनला दिली जाणारी सैन्य आणि गुप्तचर मदत रोखली होती. मात्र आता युक्रेनने 30 दिवसांच्या युद्धविरामास होकार दिल्याने ही मदत पुन्हा सुरू करण्यात आली आहे.
