पर्यटन विभागाच्या वतीने 2 ते 4 मे दरम्यान होत असलेल्या महापर्यटन उत्सवात सहभागी होत असलेल्या पर्यटकांना प्रवेशकर व वाहनतळ फी माफ करण्यात आल्याची माहिती वाईचे उपविभागीय अधिकारी राजेंद्र कचरे यांनी महाबळेश्वर येथे बोलताना दिली.
यावेळी राज्य पर्यटन विकास महामंडळाचे वरिष्ठ प्रादेशिक व्यवस्थापक हनुमंतराव हेडे, तहसीलदार तेजस्विनी पाटील, पालिकेचे मुख्याधिकारी योगेश पाटील, सार्वजनिक बांधकाम विभागाचे उपविभागीय अधिकारी अजय देशपांडे आदी मान्यवर उपस्थित होते.
महाबळेश्वर या पर्यटनस्थळी मोठ्या प्रमाणावर पर्यटक यावेत, यासाठी पर्यटनमंत्री देसाई यांच्या संकल्पनेतून महाबळेश्वर येथे 2 ते 4 मे या दरम्यान तीन दिवसीय महापर्यटन उत्सव आयोजित करण्यात आला आहे. या महोत्सवाची शासकीय पातळीवर जोरदार तयारी सुरू आहे. तब्बल 20 ते 22 वर्षांनी होत असलेला हा पर्यटन उत्सव यशस्वी व्हावा, यासाठी याची जबाबदारी संभाजीनगर येथील ई-फॅक्टर या खासगी इव्हेंट कंपनीला दिली आहे. उत्सवातील कार्यक्रमाच्या सादरीकरणासाठी शहरातील प्रमुख पदाधिकारी व नागरिकांची बैठक वाई प्रांताधिकारी राजेंद्र कचरे यांच्या अध्यक्षतेखाली झाली. यावेळी त्यांनी टोल माफ करण्यात आल्याची माहिती दिली.
राजेंद्र कचरे म्हणाले की, महापर्यटन उत्सव स्थानिक नागरिकांच्या सहकार्याशिवाय यशस्वी होणार नाही. म्हणूनच उत्सवाची माहिती देत मते जाणून घेणे आवश्यक आहे. महापर्यटन उत्सवाची माहिती सर्वदूर पोहचविण्यासाठी सर्वच मार्गांचा अवलंब करण्यात येणार आहे. रेडीओ, टीव्ही, वर्तमानपत्र या बरोबरच सोशल मीडिया यांचाही वापर करण्यात येणार आहे. टॅक्सी व लक्झरी बसेसवर जाहिरात करणारे स्टिकर लावण्यात येतील. शहरात कमानी उभारल्या जातील, तसेच मुंबई-बंगळुरू-गोवा या महामार्गावर होर्डिंग्ज लावली जातील. हॉटेलमध्येही स्वागत कक्षात उत्सवाची कार्यक्रमपत्रिका लावली जाईल. तीन दिवस आलेल्या पर्यटकांना एक किट देण्यात येईल. या किटमध्ये माहितीपत्रक असेल, अशी माहिती ई-फॅक्टर या इव्हेंट कंपनीच्या वतीने अनिकेत सराफ यांनी नागरिकांना दिली.
यावेळी झालेल्या चर्चेत माजी नगराध्यक्ष डी. एम. बावळेकर, जिल्हा बँकेचे संचालक राजेंद्रशेठ राजपुरे, माजी सभापती संजय गायकवाड, राजेश कुंभारदरे, किसनशेठ शिंदे. अॅड. संजय जंगम, रवींद्र कुंभारदरे, गिरीश नायडू, गोपाळ लालवेग, सी. डी. बावळेकर, विजय भिलारे यांनी सहभाग घेतला. यावेळी युसूफ शेख, रमेश पलोड, रमेश कौल, किसन खामकर, सूर्यकांत जाधव, ऋषी वायदंडे, सी. डी. हेवे, नायब तहसीलदार दीपक सोनवले, विनोद सावंत, पोलीस निरीक्षक बापूसाहेब सांडभोर, सहदेव भिसे उपस्थित होते.
वेण्णा लेक येथे तरंगता बाजार
आपल्या संस्कृतीबरोबरच पाश्चिमात्य संस्कृतीचा मिलाफ पाहावयास मिळणार आहे. वेण्णा लेक येथे तरंगता बाजार भरवला जाणार आहे. त्याचबरोबर सायंकाळी भव्य लेझर-शो तसेच ड्रोन-शो भरविण्यात येणार आहे. बाजारपेठेबरोबरच काही पॉइंटवर करमणुकीचे कार्यक्रम सादर केले जाणार आहेत. तापोळा येथे जलक्रीडा, तर भोसे येथे साहसी खेळ खेळण्याची संधी पर्यटकांना मिळणार आहे. पोलीस मैदानावर मोफत वाहनतळाची सोय करण्यात आली आहे, असेही राजेंद्र कचरे यांनी सांगितले.
