गुजरातमध्ये नवसारी परिसरात एका ट्रान्सपोर्ट गोदामाला शनिवारी सकाळी भीषण आग लागल्याची घटना घडली. या आगीत तीन जण ठार झाले तर तीन जण गंभीर जखमी झाले. आगीची माहिती मिळताच अग्नीशमन दलाच्या गाड्या आणि स्थानिक पोलीस कर्मचारी घटनास्थळी दाखल झाले. जखमींना उपचारासाठी वलसाड येथील रुग्णालयात दाखल करण्यात आले आहे.
पोलिसांनी दिलेल्या माहितीनुसार, गोदामात ट्रकमधून केमिकल बॅरल्स उतरवत असताना आग लागल्याचे प्राथमिक तपासात कळते. अग्नीशमन दलाने शर्थीचे प्रयत्न करत आग नियंत्रणात आणली. याप्रकरणी अधिक चौकशी सुरू आहे, असे चिखली विभागाचे डीएसपी भगीरथसिंग गोहिल यांनी सांगितले.
