कार बाजूला घेण्याच्या वादातून राष्ट्रवादी अजित पवार गटाच्या जिल्हाध्यक्षांनी भररस्त्यात तरुणावर हल्ला केल्याची घटना समोर आली आहे. राष्ट्रवादीचे जिल्हाध्यक्ष भरत गंगोत्री यांची दादागिरी मोबाईल कॅमेऱ्यात कैद झाली आहे. याप्रकरणी उल्हासनगर पोलीस ठाण्यात भरत गंगोत्री आणि त्यांच्या 5 साथीदारांविरोधात गुन्हा दाखल करण्यात आला आहे.
उल्हासनगर कॅम्प नंबर 2 मध्ये मधुबन चौकात हा सर्व प्रकार घडला. क्रिश बजाज नामक तरुणाची कार रस्त्यात बंद पडली होती. ही कार बाजूला घेण्यावरून क्रिश बजाज आणि भरत गंगोत्री यांच्यात वाद झाला.
या वादाचे नंतर हाणामारीत रुपांतर झाले. गंगोत्री यांच्या एका साथीदाराला मारहाण करण्यात आली. यानंतर गंगोत्री यांच्यासह त्यांच्या साथीदारांनी क्रिश बजाजला मारहाण केली. गंगोत्री एवढ्यावरच थांबले नाहीत. मारहाणीनंतर क्रिशवर तीक्ष्ण हत्यारांनी हल्ला केला.
या हल्ल्यात क्रिश बजाज हा जखमी झाला. क्रिशला तात्काळ उपचारासाठी रुग्णालयात दाखल करण्यात आले आहे. याप्रकरणी पोलीस तपास करत आहेत.
