बंगळुरूमधील केम्पेगौडा आंतरराष्ट्रीय विमानतळावर एका टेम्पो ट्रॅव्हलरचा इंडिगो विमानाशी टक्कर झाल्याचा फोटो व्हायरल होत आहे. शुक्रवारी एका टेम्पो ट्रव्हलरने पार्क केलेल्या इंडिगो विमानाला धडक दिली. विमानतळाच्या अल्फा पार्किंग बे 71 येथे ही घटना घडली. विमानतळ प्रशासनाने सांगितले की, हा टेम्पो एका थर्ड पार्टी ग्राऊंड हँडलिंग एजन्सीचा होता आणि विमानतळ कर्मचाऱ्यांना सोडण्यासाठी वापरला जात होता.
विमान इंजिन दुरुस्तीसाठी आधीच ग्राऊंड करण्यात आले होते. त्यामुळे विमानात एकही प्रवासी उपस्थित नव्हता. अपघाताचे फोटो सोशल मीडियावर वेगाने व्हायरल होत आहेत. फोटोंमध्ये टेम्पोचे छत फाटलेले, गाडीची काच तुटलेली आणि गाडीचा पुढचा भाग खराब झालेला स्पष्टपणे दिसत आहे. विमानतळ प्रशासनाने सांगितले की, या अपघाताची माहिती नागरी विमान वाहतूक महासंचालनालयाला देण्यात आली असून या प्रकरणाची चौकशी केली जात आहे.
