166 निरपराध नागरिकांचा बळी घेणारा, 26 नोव्हेंबर 2008च्या मुंबईवरील दहशतवादी हल्ल्याचा मास्टरमाइंड, लष्कर-ए-तोयबाचा दहशतवादी तहव्वूर हुसेन राणा याला अखेर आज विशेष विमानाने हिंदुस्थानात आणण्यात आले. यूपीए सरकारच्या काळात 2009मध्ये अमेरिकेत त्याच्या मुसक्या आवळण्यात आल्या होत्या. तब्बल 16 वर्षांच्या लढाईनंतर अखेर त्याचे हिंदुस्थानात प्रर्त्यापण करण्यात आले. राणाला कडेकोट बंदोबस्तात घेऊन आलेले विशेष विमान दिल्लीतील पालम विमानतळावर उतरल्यानंतर एनआयए अर्थात राष्ट्रीय तपास यंत्रणेने राणाला तत्काळ ताब्यात घेतले.
मुंबईसह आग्रा, दिल्ली, कोची, अहमदाबाद येथेही तहव्वूर राणाने पत्नी समराज राणा अख्तरसह भेटी दिल्या होत्या. 13 ते 21 नोव्हेंबर 2008 दरम्यान या दोघांनी विविध ठिकाणांची रेकी केली होती. त्यानंतर दहशतवादी हल्ल्यांचा कट रचण्यात आला होता व 26 नोव्हेंबरला मुंबईवर हल्ला झाला होता. याबाबत आता राणाच्या चौकशीतूनच अधिक माहिती उघड होणार आहे. दरम्यान, राणा पाकिस्तानच्या आयएसआयच्या संपका&त होता. त्यामुळे त्याच्या चौकशीत दहशतवादी कारवायांना प्रोत्साहन देणाऱया पाकिस्तानचा बुरखाही टराटरा फाडला जाणार आहे. हेडलीविरोधात मुंबई पोलिसांनी दाखल केलेल्या आरोपपत्रात साक्षीदाराच्या जबाबाचा समावेश असल्याचे सूत्रांनी म्हटले आहे. मुंबईवरील हल्ल्यात दहशतवाद्यांनी छत्रपती शिवाजी महाराज टर्मिनस, हॉटेल ताज महाल पॅलेस आणि लिओपोल्ड कॅफे या ठिकाणांना लक्ष्य केले होते.
दहशतवादी हल्ला मुंबईत, राणाचा ताबा एनआयएकडे
तहव्वूर राणाचा ताबा मुंबई पोलिसांऐवजी एनआयएकडे का, असा प्रश्न अनेकांना पडला असेल. याचे एक कारण म्हणजे मुंबईवरील हल्ल्यांचे आरोपपत्र 2009 साली सादर झाले तेव्हा त्यात राणाचा फरार आरोपी म्हणून उल्लेख नव्हता. याउलट 2011मध्ये एनआयएने त्याचा आपल्या आरोपपत्रात प्रथम उल्लेख केला होता. या प्रकरणात 2009मध्ये एनआयएने दिल्लीच्या न्यायालयात पहिले आरोपपत्र दाखल केले होते. यात सात पाकिस्तानी नागरिकांसह दोघांवर खून, कट आणि राष्ट्राविरोधात युद्ध पुकारण्याचा आरोप होता. पुढे अमेरिकेत जाऊन एनआयएने राणाची चौकशीही केली. कटाच्या कारस्थानात मुंबईवरील हल्ल्यांचाही समावेश होता. त्या वेळी राणाच्या विरोधात रेड कॉर्नर नोटीस काढण्याची पहिली मागणी एनआयएने केली. 2023 साली राणाच्या प्रत्यार्पणाची चर्चा सुरू झाली तेव्हा कुठे मुंबईवरील हल्ल्याच्या केसमध्ये राणाचा उल्लेख फरारी आरोपी म्हणून करण्यात आला.
न्यायाच्या दिशेने महत्त्वाचे पाऊल – अमेरिका
राणाचे प्रत्यार्पण आणि त्याला हिंदुस्थानात आणणे हे मुंबईवरील हल्ल्यात प्राण गमावलेल्या निरपराध नागरिकांना न्याय मिळण्याच्या दिशेने अत्यंत महत्त्वाचे पाऊल असल्याचे अमेरिकेने म्हटले आहे.
दयान कृष्णन करणार युक्तिवाद; सरकारी वकील नरेंद्र मान देणार साथ
तहव्वूर राणा याच्याविरोधात एनआयएच्या विशेष न्यायालयात राणाला कठोरात कठोर शिक्षा मिळण्यासाठी युक्तिवाद करणार आहेत. राणाचे अमेरिकेतून हिंदुस्थानात प्रत्यार्पण करण्यासाठी कृष्णन यांनीच महत्त्वाची भूमिका बजावली होती. 2010 पासून राणाचे हिंदुस्थानकडे प्रत्यार्पण करण्याच्या कार्यवाहीशी जोडले गेले. राणाला कठोर शिक्षा मिळण्यासाठी दयान कृष्णन यांना विशेष सरकारी वकील नरेंद्र मान यांची साथ मिळणार आहे. केंद्र सरकारने त्यांची नियुक्ती केली असून मान हे अनुभवी वकील आहेत.
पांढरी दाढी, काळा चष्मा
राणाला कडेकोट बंदोबस्तात हिंदुस्थानात आणण्यात आले. त्यानंतरचा त्याचा एक फोटो समोर आला आहे. यात पांढरे केस, पांढरी झालेली दाढी आणि काळा चष्मा दिसत आहे. तसेच अंगावर चॉकलेटी रंगाचे कपडे दिसत आहेत.
तो आमचा नव्हे; पाकिस्तानने हात झटकले
तहव्वूर राणाशी आमचा काहीही संबंध नसल्याचे सांगत पाकिस्तानने हात झटकले आहेत. पाकिस्तानच्या परराष्ट्र कार्यालयाने याप्रकरणी एक निवेदन प्रसिद्ध केले आहे. राणा याने गेल्या दोन दशकांत त्याच्याकडील पाकिस्तानी कागदपत्रांचे नूतनीकरण केलेले नाही. त्यामुळे आमचा त्याच्याशी काहीही संबंध नसून तो आता कॅनडियन नागरिक आहे, हे स्पष्ट आहे, असे पाकिस्तानने म्हटले आहे. दरम्यान, 1961 मध्ये पाकिस्तानात जन्मलेल्या राणाने पाकिस्तान आर्मी मेडिकल कॉर्प्समध्ये सेवा बजावली असून त्यानंतर 1990 च्या दशकात तो कॅनडाला गेला आणि तिथले नागरिकत्व घेतले.
बिर्याणी देऊ नका, फासावर लटकवा!
राणाला दहशतवादी कसाबप्रमाणे स्पेशल ट्रीटमेंट देऊ नये. त्याला बिर्याणी, वेगळा अंडासेल अशा खास सवलती देऊ नये. त्याला 15 दिवसांच्या आत मरेपर्यंत फाशीच झाली पाहिजे किंवा गोळय़ा घातल्या पाहिजेत, अशी प्रतिक्रिया मोहम्मद तौफिक ऊर्फ छोटू चायवाला याने दिली आहे. हल्ल्यावेळी छत्रपती शिवाजी महाराज टर्मिनसवर छोटू चायवालाच्या सतर्कतेमुळे अनेकांचे प्राण वाचले. मी तो दिवस पाहिला आहे. कुणाचे आई-वडील तर कुणाचे भाऊ-बहीण गेले, असे मोहम्मद तौफिक म्हणाले.
फाशीच झाली पाहिजे- देविका
मुंबईवरील हल्ल्यातील पाकिस्तानात लपलेल्या इतर दहशतवाद्यांनाही हिंदुस्थानात आणले पाहिजे. त्यांचे चेहरेही जगासमोर यायला हवेत, असे मुंबईवरील हल्ल्यात जखमी झालेल्या देविका तोटावन हिने सांगितले. हल्ल्याप्रसंगी देविका नऊ वर्षांची होती. छत्रपती शिवाजी महाराज टर्मिनसवर गोळीबार सुरू झाला त्यावेळी ती तिथेच होती. दहशतवाद्यांच्या गोळीबारात तिच्या पायात गोळी लागली होती.
भक्कम पुरावे, खटला चालणार
राणाविरोधात भक्कम पुरावे असून त्याच्यावर खटला चालणार आहे. त्याची कसून चौकशी होणार असून त्यात हल्ल्यातील पाकिस्तानचा सहभाग, डेव्हिड कोलमन हेडलीने आणि राणाने कशा प्रकारे मुंबईतील विविध ठिकाणची रेकी केली, मुंबईतील गर्दीच्या ठिकाणांबाबत केलेली चर्चा आणि रचलेला कट इत्यादींबाबतची माहिती समोर येणार आहे. याच ठिकाणांचा उल्लेख डेव्हिड हेडलीच्या संभाषणातही असून पुढे त्या ठिकाणी दहशतवाद्यांनी हल्ला केल्याचे समोर आले.
राणाला अमेरिकेतून दिल्लीत सुपर मिड-साईज बिझनेस जेट विमानाने आणण्यात आले. हे विशेष विमान व्हिएन्ना येथील एयरक्राफ्ट चार्टर सर्व्हीसकडून भाडय़ाने घेण्यात आले होते.
विमान बुधवारी पहाटे 2 वाजून 15 मिनिटांनी मियामीमधून उडाले. त्यानंतर रोमानियाची राजधानी बुखारेस्ट येथे त्याच दिवशी सायंकाळी 7 वाजता पोहोचले.
जवळपास 11 तासांची विश्रांती घेतल्यानंतर विमानाने आज पहाटे 6 वाजून 15 मिनिटांनी दिल्लीसाठी उड्डाण घेतले आणि सायंकाळी 6 वाजून 22 मिनिटांनी विमान दिल्लीतील पालम विमानतळावर पोहोचले.
कोठडीचा निर्णय राखून ठेवला
राणाला रात्री उशिरा पतियाळा हाऊस कोर्टात हजर करण्यात आले. एनआयएने 20 दिवसांची कोठडी मागितली. त्यानंतर कोर्टाने निर्णय राखून ठेवला. दरम्यान, कोणताही अनुचित प्रकार घडू नये यासाठी न्यायालय परिसरात कडेकोट बंदोबस्त होता. राणाची रवानगी तिहार तुरुंगात होण्याची शक्यता आहे.
आझाद मैदानात फाशी द्या – एकनाथ ओंबळे
कसाबला फाशी देण्यास बराच उशीर झाला, पण तहव्वूर राणा याच्या बाबतीत असे होऊ देऊ नका. त्याला आझाद मैदानात सर्वांसमोर फाशी द्या. त्याचा एकेक अवयव छाटा, अशी मागणी मुंबईवरील हल्ल्याप्रसंगी दहशतवादी कसाबला पकडताना हुतात्मा झालेले सहाय्यक पोलीस उपनिरीक्षक तुकाराम ओंबळे यांचे बंधू एकनाथ ओंबळे यांनी केली आहे. प्रसारमाध्यमांसमोर तुकाराम ओंबळे यांची आठवण काढताना एकनाथ यांचा पंठ दाटून आला.
