दोन वेळच्या चॅम्पियन असलेल्या यजमान वेस्ट इंडीजला टी-20 क्रिकेट वर्ल्ड कपची उपांत्य फेरी गाठण्यासाठी उद्या (दि.24) दक्षिण आफ्रिकेविरुद्ध जिंकावेच लागणार आहे. सुपर-8 फेरीत इंग्लंडकडून पराभूत झाल्याने विंडीज संघ सध्या अडचणीत आहे. अमेरिकेवर मोठा विजय मिळवून त्यांनी गुणतालिकेत दक्षिण आफ्रिकेनंतर दुसरे स्थान मिळविले आहे. त्यामुळे दक्षिण आफ्रिकेविरुद्धचा केवळ विजयही विंडीजसाठी उपांत्य फेरीचे दार उघडू शकतो, मात्र विंडीजचा पराभव झाल्यास इंग्लंडला अमेरिकेला हरवून उपांत्य फेरी गाठण्याची संधी असेल. त्यामुळे विंडीजसाठी दक्षिण आफ्रिकेविरुद्धचा अखेरचा सुपर-8 सामना खऱया अर्थाने अस्तित्वाची लढाई असेल.
