चंद्रपूर जिल्ह्यातील चिमूर येथील बेपत्ता महिलेचा अखेर मृतदेह सापडला आहे. हा मृतदेह नागपूर शहराजवळील हरिश्चंद्रवेळा गावाजवळ निर्जनस्थळी आढळून आला. याप्रकरणात पोलीसांनी नरेश डाहुले या निलंबित पोलिसाला अटक केली आहे. हा पोलीस चंद्रपूर स्थानिक गुन्हे शाखेतून निलंबित झाला होता. मृतदेह सापडलेल्या महिलेचे नाव अरुणा काकडे ( 37) असे असून ती या पोलिसाची वर्गमैत्रिणी होती. चिमूर येथे ती देवांश जनरल स्टोर्स नामक दुकान चालवायची.
अरुणा काकडे 26 नोव्हेंबर रोजी नागपुरातील इतवारी मार्केटमध्ये दुकानातील सामान खरेदी करण्यासाठी गेली होती. पण त्यानंतर ती परतलीच नाही. यामुळे कुटुंबियांनी चिमूर पोलीस स्टेशनमध्ये तक्रार दाखल केली. तक्रारीच्या अनुषंगाने नागपूर आणि चंद्रपूर पोलिसांनी संयुक्तपणे या प्रकरणाचा तपास केला. यात निलंबत पोलीस कर्मचारी नरेश डाहुले याने अरुणाचा खून केल्याचे निष्पन्न झाले. 26 तारखेला मृतक अरुणा आणि आरोपी नरेश नागपूरला एकत्र होते. या दोघांमध्ये गेल्या काही दिवसांपासून वाद सुरु होता. दोघे नागपूरला गेले असताना दोघांमधील वाद विकोपाला गेला आणि आरोपीने अरुणाचा गळा दाबून हत्या केली. नरेश डाहुलेचा चंद्रपूर शहरातील अनेक घरफोड्यांमध्ये समावेश असल्याने त्याला वर्षभरापूर्वी निलंबित केले गेले होते. पोलिसांनी कॉल रेकॉर्डच्या मदतीने आरोपीचा शोध घेतला.
