गेल्या काही दिवसांपासून राजकारण्यांपासून ते पोलीस दलापर्यंत अनेकांवर आरोप करून चर्चेत असलेले निलंबित पोलीस उपनिरीक्षक रणजित कासले याला सेवेतून बडतर्फ करण्यात आले आहे. छत्रपती संभाजीनगर परिक्षेत्राचे पोलीस महानिरीक्षक वीरेंद्र मिश्र यांनी हे आदेश काढले आहेत.
स्थानिक गुन्हे शाखेत नोकरीस असलेल्या उपनिरीक्षक रणजित कासले याने काही दिवसांपासून सोशल मीडियावर वेगवेगळे व्हिडीओ टाकून खळबळ उडवून दिली होती. गुजरातमध्ये विनापरवानगी तपासासाठी जाऊन कासले याने पैसे घेतले होते. याप्रकरणी चौकशी करून त्याच्यावर निलंबनाची कारवाई करण्यात आली होती. आज शुक्रवारी सकाळी बीड पोलिसांनी त्याला ताब्यात घेतले. परंतु त्याआधीच गुरुवारी रात्री छत्रपती संभाजीनगरचे विशेष पोलीस महानिरीक्षक वीरेंद्र मिश्र यांनी कासले याला पोलीस खात्यातून बडतर्फचे आदेश काढले. अपर पोलीस अधीक्षक सचिन पांडकर यांनी ही माहिती दिली. कासले याने अनेक व्हिडीओ व्हायरल केले होते. यातील एकामध्ये त्याने एका समाजाबाबत आक्षेपार्ह विधान केले. या प्रकरणी बीडमधील वकिलाच्या फिर्यादीवरून 14 एप्रिल रोजी शिवाजीनगर पोलीस ठाण्यात गुन्हा दाखल झाला होता. त्यानंतर पोलीस त्याच्या मागावर होते. परंतु तो सापडत नव्हता, उलट त्याने महाराष्ट्र पोलिसांना हिंमत असेल तर पकडून दाखवा, असे आव्हान दिले होते. परंतु गुरुवारी रात्री तो पुण्यात आला. विमानतळावरच त्याने माध्यमांशी संवाद साधला. यावेळी त्याने पुन्हा एकदा सरकार आणि वरिष्ठ पोलीस अधिकारी यांच्यावर आरोप केले. धनंजय मुंडे आणि वाल्मीक कराड यांच्यावरही सडकून टीका केली.
गुरुवारी सकाळी कासले याने सोशल मीडियावरून काही रील्स व्हायरल केल्या. अॅट्रॉसिटीचा गुन्हा दाखल होताच स्थानिक गुन्हे शाखेचे पथक कासलेच्या मागावर होते, परंतु त्यांनाही तो सापडला नाही. वेगवेगळे ठिकाण सांगून त्याने बीड पोलिसांना दोन दिवस चांगलेच घुमवले. गुरुवारीही तो शरण येणार, असे सांगितले होते. परंतु त्याने पुन्हा एकदा चकवा दिला. परंतु बीड पोलिसांनी पुण्यातील स्वारगेट परिसरातील एका लॉजमधून कासले याला ताब्यात घेतले.
