डेल्फ्ट बेटाजवळ श्रीलंकेच्या नौदलाने केलेल्या गोळीबारात मंगळवारी 5 हिंदुस्थानी मच्छिमार जखमी झाले आहेत. यातील दोन मच्छिमारांची प्रकृती गंभीर असल्याचे समजते. या घटनेनंतर हिंदुस्थानच्या परराष्ट्र मंत्रालयाने या घटनेबाबत श्रीलंकेकडे तीव्र शब्दात नाराजी व्यक्त केली. हिंदुस्थानने श्रीलंकेच्या उच्चायुक्तांना बोलावून घेत याबाबत निषेध नोंदवला. तसेच कोलंबो येथील हिंदुस्थानचे उच्चायुक्त हे श्रीलंकेच्या परराष्ट्र विभागाशी संवाद साधून हा विषय लावून धरणार असल्याचे सांगितले आहे.
परराष्ट्र मंत्रालयाने म्हटले आहे की, मंगळवारी सकाळी डेल्फ्ट बेटावर 13 हिंदुस्थानी मच्छिमारांना ताब्यात घेत असताना श्रीलंकेच्या नौदलाकडून गोळीबार झाल्याची माहिती मिळाली. मासेमारी करणाऱ्या बोटीवर 13 जण होते, त्यापैकी दोघे गंभीर जखमी झाले असून त्यांच्यावर जाफना रुग्णालयात उपचार सुरू आहेत. याशिवाय, अन्य तीन मच्छिमारांनाही किरकोळ दुखापत झाली आहे, त्यांच्यावरही उपचार सुरू असल्याचे सांगितले.
या घटनेनंतर हिंदुस्थानच्या वाणिज्य दूतावासाच्या अधिकाऱ्यांनी जाफना येथील जखमी मच्छिमारांची रुग्णालयात जाऊन भेट घेतली. शिवाय त्यांच्या तब्येतीची विचारपूस केल्यानंतर यांच्या कुटुंबियांना शक्य तेवढी मदत केली. पराराष्ट्र विभागाने नवी दिल्लीत बेटावरील उच्चायुक्तांना मंगळवारी सकाळी बोलावले आणि या घटनेचा तीव्र शब्दात निषेध नोंदवण्यात आला. यासोबतच, कोलंबोमधील हिंदुस्थानच्या उच्चायुक्तालयानेही श्रीलंकेच्या परराष्ट्र मंत्रालयासमोर हा मुद्दा उपस्थित केल्याचे परराष्ट्र मंत्रालयाने म्हटले आहे. हिंदुस्थान सरकारने कायम मच्छिमारांच्या समस्या माणूसकीने हाताळण्याचा प्रयत्न केला. त्यांच्या समस्या लक्षात घेतल्या. कोणत्याही स्थितीत बळाचा वापर योग्य नसल्याचे परराष्ट्र मंत्रालयाने निवेदनात म्हटले आहे.
