आईची हत्या करून मुलाने आत्महत्येचा प्रयत्न केल्याची घटना वरळी येथे घडली. मुलावर एका खासगी रुग्णालयात उपचार सुरू आहेत. या प्रकरणी पोलिसांनी गुन्हा नोंद करून तपास सुरू केला आहे. रुग्णालयातून डिस्चार्ज मिळताच त्याला अटक केली जाणार आहे.
मृत महिला या वरळीच्या गांधीनगर येथील एका एसआरए इमारतीमध्ये राहत होत्या. तर त्यांचा मुलगा पेडर रोड येथे राहतो. कर्जावरून त्या दोघांचे वाद होत होते. शनिवारी तो महिलेच्या वरळी येथील घरी आला. तेव्हा त्यांच्यात कर्जावरून वाद झाला. वादानंतर त्याने महिलेच्या तोंडावर नॅपकीन ठेऊन तोंड आणि नाक दाबून तिची गळा आवळून हत्या केली. हत्या केल्यानंतर त्याने तीक्ष्ण हत्याराने स्वतःच्या गळ्यावर वार करून आत्महत्येचा प्रयत्न केला.
या घटनेची माहिती स्थानिकांनी वरळी पोलिसांना दिली. त्यानंतर वरळी पोलीस घटनास्थळी आले. त्या दोघांना पोलिसांनी रुग्णालयात दाखल केले. तेथे डॉक्टरांनी महिलेला तपासून मृत घोषित केले. तर महिलेच्या मुलाची प्रकृती गंभीर असल्याने त्याला एका खासगी रुग्णालयात दाखल केले आहे. हत्येसह आत्महत्येचा प्रयत्न केल्या प्रकरणी वरळी पोलिसांनी गुन्हा नोंद केला. महिलेचा मुलगा हा त्याच्या पत्नीसोबत राहत होता. तो गेल्या काही महिन्यांपासून बेरोजगार होता. त्यात त्याला कर्ज झाले होते. कर्जावरून त्या दोघांचा वाद सुरू होता.
