अमेरिकेच्या राष्ट्राध्यक्षपदाची दुसऱ्यांदा सूत्र हाती घेतल्यापासून डोनाल्ड ट्रम्प यांनी निर्णयांचा धडाका लावला आहे. ट्रम्प प्रशासनाने लादलेल्या टॅरिफमुळे जगभरात खळबळ उडाली. शेअर बाजार कोसळले, व्यापार युद्ध सुरू होण्याची भीती व्यक्त केली जाऊ लागली. अनेक देशांनी यावर नाराजी व्यक्त केली. त्यानंतर ट्रम्प प्रशासनाने काही देशांवरील आयातशुल्क वाढीस 90 दिवसांची स्थगिती दिली.
दुसरीकडे अमेरिकेने चीनवरील टॅरिफ मात्र 145 टक्के केले. याला चीनने प्रत्युत्तर देत अमेरिकी उत्पादनांवर 125 टक्के टॅरिफ लावला. हे व्यापारयुद्ध अधिक तीव्र होण्याची शक्यता वर्तवली जात असताना ट्रम्प प्रशासनाने आणखी एक मोठा निर्णय घेत स्मार्टफोन, लॅपटॉप, सेमीकंडक्टर चिप्ससह इलेक्ट्रॉनिक उत्पादनांना टॅरिफमधून सूट दिली आहे. अमेरिकेच्या सीमाशुल्क आणि सीमा संरक्षण विभागाच्या सूचनेनुसार ही उत्पादने चीनवर लावण्यात येणाऱ्या 145 टॅरिफच्या किंवा इतरत्र लावण्यात येणाऱ्या 10 टक्के टॅरिफच्या अधीन राहणार नाहीत.
स्मार्टफोन, लॅपटॉप, सेमीकंडक्टर चिप्ससह अनेक इलेक्ट्रॉनिक उत्पादने चीनमधून आयात केली जातात. मात्र अमेरिकेने चीनवर 145 टक्के टॅरिफ लादल्याने याच्या किंमती गगनाला भिडण्याची शक्यता निर्माण झाली होती. मात्र आता अमेरिकेने या वस्तूंना टॅरिफमधून वगळल्याने अॅपल, मायक्रोसॉफ्ट, सॅमसंग, एनव्हीडियासारख्या बड्या कंपन्यांना मोठा दिलासा मिळाला आहे. ‘इंडिया टूडे’ने याबाबत वृत्त दिले आहे.
अॅपल या नामांकित कंपनीच्या आयफोनचे सुमारे 80 टक्के उत्पादन आणि असेंब्ली चीनमध्ये होती. तर 20 टक्के हिंदुस्थानमध्ये होते. यासह स्मार्टफोन, संगणक, डिस्क ड्राईव्ह, डेटा प्रोसेसिंग उकरणं, सेमींकडक्टर उपकरणं, मेमरी चिप्स, फ्लॅट पॅनल डिस्प्ले, टेलिकम्युनिकेशन उपकरणं, चिपमेकिंग मशीन, रेकॉर्डिंगची उपकरणं, प्रिंटेड सर्किट बोर्ड असेंब्ली यांचीही प्रामुख्याने आयात चीनमधून केली जाते. ही उत्पादनं देशातच बनवण्याच्या सुविधा उभारण्यासाठी अमेरिकेला अनेक वर्ष जातील. त्यामुळे ही उत्पादनं टॅरिफमधून तात्पुरती वगळली असावी किंवा लवकरच यावर नवीन कर लागू केला जाऊ शकतो, असे तज्ज्ञांनी म्हटले आहे.
