नाताळच्या सुट्टीनिमित्त गावाकडे जात असतानाच एका कुटुंबावर वाटेतच काळाने घाला घातला. गावी पोहचण्याआधीच एकाच कुटुंबातील सहा जणांचा करुण अंत झाला. बंगळुरू राष्ट्रीय महामार्गावर कारवर कंटेनर पलटल्याने कारमधील आयटी इंडिनिअरसह सहा जणांचा जागीच मृत्यू झाला. या घटनेमुळे गावावर शोककळा पसरली आहे.
चंद्रम इगाप्पागोळ, धोराबाई, गण, दिक्षा, आर्या, विजयालक्ष्मी अशी अपघातात मृत झालेल्यांची नावे आहेत. हे सर्वजण सांगलीच्या जत तालुक्यातील मोरबगी गावचे रहिवासी आहेत. चंद्रम इगाप्पागोळ हे बंगळुरूत एका सॉफ्टवेअर कंपनीत नोकरी करत होते. यामुळे ते कुटुंबासह बंगळुरूत राहत होते.
नाताळच्या सुट्टीनिमित्त सर्व कुटुंब मूळगावी येत होते. यावेळी बंगळुरू राष्ट्रीय महामार्गावरील तळकेरेजवळ एक कंटेनर कारवर पडला. यात कारचा चक्काचूर होऊन कारमधील सहा जणांचा जागीच मृत्यू झाला. याप्रकरणी नेलमंगला वाहतूक पोलीस ठाण्यात अपघाताचा गुन्हा दाखल करण्यात आला आहे.
