केंद्रातील नरेंद्र मोदी सरकार आणि राज्यातील मिंधे सरकारच्या काळात बेरोजगारी सातत्याने वाढत आहे. सरकार रोजगाराच्या संधी निर्माण करण्यात अपयशी ठरले आहे. अशा परिस्थितीतही शिवसेना उद्या हजारो बेरोजगारांना हक्काची नोकरी देणार आहे. त्यासाठी विलेपार्ले येथे ‘महा नोकरी’ मेळाव्याचे आयोजन करण्यात आले असून त्याचे उद्घाटन शिवसेना पक्षप्रमुख उद्धव ठाकरे यांच्या हस्ते होणार आहे. शिवसेना नेते, युवासेना प्रमुख, आमदार आदित्य ठाकरे यांचीही या मेळाव्याला प्रमुख उपस्थिती राहणार आहे.
मुंबई पदवीधर मतदारसंघाचे आमदार, शिवसेना नेते अ‍ॅड. अनिल परब यांनी निवडणूक जाहिरनाम्यात दिलेले वचन पूर्ण करण्यासाठी हा महा नोकरी मेळावा शिवसेनेच्या माध्यमातून आयोजित केला आहे. विलेपार्ले पूर्व, सहारा हॉटेलजवळ, बालाजी रेस्टॉरंटच्या एटीसी टॉवरसमोर, 1 बी एमएलसीपी पार्किंग तळमजला येथे हा मेळावा उद्या सकाळी 9 ते सायंकाळी 6 वाजेपर्यंत होणार आहे.
13 हजार युवकांनी या मेळाव्यासाठी नोंदणी केली आहे. तसेच सुमारे 16 हजार युवक मेळाव्यात सहभाग घेतील, असा अंदाज आहे. सुमारे 14 हजार युवकांना या मेळाव्यात रोजगार मिळेल. मेळाव्यासाठी नोंदणी केलेल्या युवकांनी येताना बायोडेटा, केवायसी कागदपत्रे आणि छायाचित्र सोबत आणावे, असे आवाहन आमदार अनिल परब यांनी केले आहे.
लॉजिस्टीक, बँकिंग, इन्शुरन्स, बीपीओ, हॉस्पिटॅलिटी, फायनान्स, शिक्षण, बांधकाम, माहिती तंत्रज्ञान, उद्योग क्षेत्रातील 130 कंपन्या या मेळाव्यात सहभागी होणार आहेत. त्यात अॅमेझॉन, हिंदुजा, एचडीएफसी, एसबीआय, बजाज, टाटा एआयजी, एअरटेल, आयसीसी लोम्बार्ड अशा नामांकित कंपन्यांचा समावेश आहे.
स्थळ ः 1 बी एमएलसीपी पार्किंग टी 1 तळमजला, पार्ले (पू.)
वेळ ः सकाळी 9 ते सायं. 6 पर्यंत
