आगामी काळात मुंबईसह 14 महानगरपालिकांच्या निवडणुका होणार आहे. कार्यकर्त्यांना संधी मिळावी आणि पक्षवाढीला बळ मिळावे म्हणून या निवडणुकीमध्ये शिवसेना स्वबळावर लढणार आहे, अशी घोषणा शिवसेना (उद्धव बाळासाहेब ठाकरे) नेते, खासदार संजय राऊत यांनी केली. ते नागपूरमध्ये पत्रकारांशी संवाद साधत होते.
स्थानिक स्वराज्य संस्थांच्या निवडणुकीबाबत विचारले असता संजय राऊत म्हणाले की, मुंबईसह नागपूरपर्यंत आम्ही स्वबळावर लढू. काय होईल ते होईल. एकदा आम्हाला आजमावायचेच आहे. मुंबई, ठाणे, पुणे, नागपूर असेल… कार्यकर्त्यांना संधी कधी मिळणार? आघाडीमध्ये असताना लोकसभा, विधानसभा निवडणुकीत कार्यकर्त्यांना लढण्याची संधी मिळत नाही. त्याचा फटका पक्षाच्या वाढीला बसतो. त्यामुळे महानगरपालिका, जिल्हापरिषद आणि नगरपंचायतीमध्ये स्वबळावर लढून आपापले पक्ष मजबूत करावे.
