सोशल मीडियावर व्हिडीओ व्हायरल करण्याच्या कारणावरून कसबा बावडा येथे शिवसेना (उद्धव बाळासाहेब ठाकरे) पक्षाचे पदाधिकारी राहुल माळी यांना शिंदे गटाकडून शिवीगाळ करून अरेरावी केल्याने वादाला तोंड फुटले. तीन हजारांहून अधिकच्या जमावात आमदार सतेज पाटील, राजेश क्षीरसागर आणि सत्यजित कदम हजर असल्याने परिस्थिती हाताबाहेर जाण्याच्या शक्यतेने वातावरण तणावपूर्ण बनले होते. यावेळी सतेज पाटील यांनी संयमी भूमिका घेत कार्यकर्त्यांना शांत केले. यावेळी कसबा बावडा परिसरात मोठा पोलीस बंदोबस्त तैनात करण्यात आला होता.
रंकाळा विकासकामासाठी शिवसेना नेते व युवासेनाप्रमुख आदित्य ठाकरे यांनी निधी दिल्याबद्दल राजेश क्षीरसागर यांनी आभार व्यक्त केल्याचा जुना व्हिडीओ काल रात्री राहुल माळी यांनी सोशल मीडियावर व्हायरल केला होता. यावरून शिंदे गटाचे सुनील जाधव यांनी राहुल माळी यांना आज दुपारी शिवीगाळ करून दमदाटीचा प्रयत्न केला. याचवेळी राजेश क्षीरसागर आणि सत्यजित कदम येथे मतदान केंद्रांना भेटी देण्यासाठी आले होते. सतेज पाटील यांना माहिती समजताच ते अजिंक्यतारा कार्यालयातून कसबा बावडय़ात दाखल झाले. प्रसंगावधान ओळखून त्यांनी कार्यकर्त्यांना चौकातील छत्रपती शिवाजी महाराज यांच्या पुतळ्याजवळ एकत्र केले.
