घरगुती हिंसाचारप्रकरणी काwटुंबिक न्यायालयाने दोषी ठरवलेल्या अजित पवार गटाचे नेते आणि माजी कॅबिनेट मंत्री धनंजय मुंडे यांना मुंबई सत्र न्यायालयाने दणका दिला आहे. पत्नी करुणाला पोटगी देणार नाही, असा दावा करत धनंजय मुंडे यांनी दाखल केलेली याचिका अतिरिक्त सत्र न्यायाधीश शेख अकबर शेख जाफर यांनी आज फेटाळून लावली. त्यामुळे मुंडे यांना पत्नी करुणाला पोटगी द्यावीच लागणार आहे.
वांद्रे न्यायालयाने धनंजय मुंडे यांना घरगुती हिंसाचार प्रकरणात दोषी ठरवत पत्नीला एक लाख 25 हजारांची पोटगी व मुलगी शिवानी हिला 75 हजार रुपये दरमहा देण्याचे आदेश दिले होते, मात्र धनंजय मुंडे यांनी हे आरोप फेटाळून लावत पत्नी व मुलीला दरमहा पोटगी देण्यास नकार देत वांद्रे न्यायालयाच्या निकालाला सत्र न्यायालयात आव्हान दिले. मुंडे यांच्या अपिलावर आज सत्र न्यायाधीश शेख अकबर शेख जाफर यांच्यासमोर सुनावणी घेण्यात आली.
कुटुंबाच्या दबावामुळे दुसरे लग्न केले
सुनावणीवेळी न्यायालयात करुणा यांनी धनंजय मुंडे यांचे अंतिम इच्छापत्र आणि स्वीकृतीपत्र सादर केले. मी कुटुंबाच्या दबावामुळे दुसरे लग्न केले, असे असले तरी मी करुणा आणि मुलांची काळजी घेईन असे स्वीकृतीपत्रात नमूद केले आहे. तर इच्छापत्रात करुणा या पहिल्या पत्नी असल्याचे म्हटले असून चार मुलांची नावे त्यात नमूद करण्यात आली आहेत. करुणा यांनी सादर केलेल्या कागदपत्रांची न्यायालयाने दखल घेत धनंजय मुंडेंचे अपील फेटाळून लावले.
