छत्तीसगड-ओडिशा सीमेजवळ गरियाबंद जिल्ह्यामध्ये सुरक्षा दलाशी झालेल्या चकमकीत 16 नक्षलवाद्यांचा खात्मा झाला आहे. त्यात सीपीआय (माओवादी) या संघटनेच्या नेता प्रताप रेड्डी उर्फ चलपती याचाही समावेश होता. त्याला पकडण्यासाठी सरकारने 1 कोटी रुपयांचं बक्षीस जाहीर केलं होतं. त्यानं सुरक्षा दलांवर अनेकदा भयंकल हल्ले केले होते. मात्र एका सेल्फीमुळे त्यांचा भांडाफोड झाला.
चलपतीने गेल्या काही वर्षांत सुरक्षा दलांवर मोठ्या प्रमाणात हल्ले केले होते. 2018 मध्ये दोन टीडीपी नेते मारले गेल्यानंतर चलपतीचे नाव प्रकर्षाने पुढे आले. आंध्रप्रदेशच्या चित्तूरमध्ये राहणारा चलपती लहान वयातच नक्षली चळवळीशी जोडला गेला होता. 23 डिसेंबर 2018 रोजी सुरक्षा दलांवर झालेल्या हल्यात देखील त्याचा हात होता. दोन टीडीपी आमदारांची हत्याही त्याच्याच सांगण्यावरून करण्यात आली होती. सीपीआय (माओवादी) संघटनेची लष्करी शाखा हाय-प्रोफाइल हल्ला ऑपरेशन्सची योजना करण्यासाठी आणि नवीन भरती करण्यासाठी त्याच्यावरच अवलंबून होती. तीन दशकांहून अधिक काळ त्याच्यावर आंध्र प्रदेश, तेलंगणा आणि छत्तीसगडच्या सीमावर्ती भागात हल्ल्यांचे कट रचणे आणि ते पूर्णत्त्वात नेण्यासाठी महत्त्वाची भूमिका निभावल्याचे स्पष्ट होते. त्यामुळे सुरक्षा दलांकडून त्याचा शोध घेतला जात होता. त्याची माहिती देणाऱ्याला 1 कोटी रुपयांचं बक्षीस देखील जाहीर करण्यात आलं होतं.
अनेक दशके भूमिगत राहिल्यानंतर मे 2016 मध्ये विशाखापट्टणममध्ये चकमकीत मारल्या गेलेल्या एका माओवादी नेत्याच्या लॅपटॉपमध्ये त्याचा आणि त्याच्या पत्नीचा सेल्फी सापडला. या सेल्फीवरून आंध्र प्रदेश पोलिसांना पहिल्यांदा चलपतीबद्दल माहिती मिळाली. अरुणा या माओवादी नेत्याशी त्याचे असलेले प्रेमसंबंध यामुळे त्याला त्याच्या संघटनेतून अडचणी येत होत्या. 2010 मध्ये त्याला अरुणा सोबत प्रेमसंबंध असल्याबद्दल एका वर्षासाठी निलंबित करण्यात आलं होतं. मात्र शेवटी त्यानं तिच्याशी लग्न केलं.
