कराड तालुक्यातील सैदापूर येथून मित्रांसोबत धबधबा पाहायला आलेला युवक सातारा तालुक्यातील दुर्गम परळी खोऱ्यात असलेल्या केळवली धबधब्यात बुडाल्याची घटना घडली. त्याला शोधण्यासाठी शर्थीचे प्रयत्न सुरू आहेत.
ऋषिकेश रमेश कांबळे (रा. सैदापूर, ता. कराड) असे बुडालेल्या युवकाचे नाव आहे. सातारा तालुका पोलीस ठाण्यात या घटनेची नोंद झाली आहे. सातारा तालुक्याच्या पश्चिमेकडे पावसाचा जोर वाढला आहे. त्यामुळे अनेक धबधब्यांवर पावसाळी पर्यटनाला प्रारंभ झाला आहे. त्यामुळे पर्यटकांची पावले साताऱ्यातील ठोसेघर, केळवली, भांबवली व जावळीतील धबधब्यांकडे कळू लागली आहेत.
परळी खोऱ्यातील केळवली धबधबा पाहण्यासाठी ऋषिकेश मित्रांसोबत आला होता. धबधब्याला मोठे पाणी असल्याने ऋषिकेश आणि त्याच्या मित्रांना पोहण्याचा मोह आवरला नाही. धबधबा परिसरात पोहत असताना ऋषिकेशला पाण्याचा अंदाज न आल्याने तो बुडाला. पोहत असताना ऋषिकेश मित्रांना दिसत नसल्याने मित्रांनी आरडाओरडा केला. या घटनेची माहिती समजताच ग्रामस्थांनी पोलिसांशी संपर्क साधला. यानंतर पोलिसांनीही घटनास्थळी धाव घेतल्यानंतर ऋषिकेशचा शोध घेण्यास सुरूवात केली. मात्र, धबधब्याच्या पाण्याचा मोठा प्रवाह आणि पावसाची रिपरिप यांमुळे शोधकार्यात अडचण येत होती.
