लाडक्या बहिणीमुळे 45 हजार कोटींचा खड्डा पडला आहे अशी टीका शिवसेना (उद्धव बाळासाहेब ठाकरे) पक्षाचे नेते, खासदार संजय राऊत यांनी केली. तसेच लाडकी बहीण आणि कर्जमाफीसाठी मोदींच्या घरातून, अदानीच्या खिशातूनत किंवा गुजरातमधून पैसे आणा असेही संजय राऊत म्हणाले.
मुंबईत आज पत्रकारांशी बोलताना संजय राऊत म्हणाले की, निती आयोग आणि या देशाची शिखर बँक यांनी जी माहिती दिली आहे त्यात स्पष्ट दिसतंय. की निवडणुकीपूर्वी मतं मिळवण्यासाठी ज्या रेवडी योजना आहेत त्यामुळे महाराष्ट्र कर्जाच्या खाईमध्ये ढकलंलं गेलं आहे. लाडक्या बहीणीमुळे 45 हजार कोटींचा खड्डा आहे. अजून कर्जमाफी व्हायची आहे. भाजपने जाहीरनाम्यात कर्जमाफीचे वचन दिले आहे. आणि ते आम्ही घेतल्याशिवाय राहणार नाही. फडणवीसजी खोटं बोलू नका. एकनाथ शिंदे, अजित पवार यांची कर्जमाफी देण्याची भूमिका आहे. लाडकी बहीण योजनेसोबतच कर्जमाफी तुम्हाला द्यावी लागेल. आणि लाडक्या बहीणींना 2100 रुपये द्यावे लागतील हे तुमचं वचन आहे. त्यामुळे पैसे कुठून आणायचे मोदींच्या घरून की अदानीच्या खिशातून की गुजरातमधून आणायचे हे तुम्ही ठरवायचे. पण ज्या घोषणा तुम्ही केल्या आहेत त्या तुम्हाला पूर्ण कराव्या लागतील असेही संजय राऊत म्हणाले.
