कुपवाड एमआयडीसीतील नवमहाराष्ट्र चाकण ऑईल मिलने तब्बल 14 कोटी 79 लाख 18 हजार 52 रुपयांचा मूल्यवर्धित कर (व्हॅट) चुकवल्याचा प्रकार उघडकीस आला आहे. याबाबत नव महाराष्ट्र चाकणचे व्यापारी योगेश नरसुदास शेठ (वय 56, रा. सिप्ला फाउंडेशनजवळ, वारजे, पुणे) व मदन मोतीलाल बोरा (वय 62,) रा. नव महाराष्ट्र हाउस, शनिवार पेठ, पुणे) या दोघांविरुद्ध कुपवाड एमआयडीसी पोलीस ठाण्यात गुन्हा दाखल झाला आहे. राज्य करनिरीक्षक वैभव माने यांनी याबाबत फिर्याद दिली आहे.
जीएसटी विभागाने दिलेल्या माहितीनुसार, व्यापारी योगेश शेठ व मदन बोरा यांचा पशुखाद्य, खाद्यतेल, सरकी पेंड आदी वस्तूंचे उत्पादन व विक्रीचा व्यवसाय आहे. त्यांची कुपवाड एमआयडीसीमध्ये नवमहाराष्ट्र चाकण ऑईल मिल आहे. त्यांचा व्यवसाय महाराष्ट्र मूल्यवर्धित कर कायदा 2002 नुसार नोंदवण्यात आला आहे. त्यांनी 1 एप्रिल 2013 ते 31 मार्च 2017 अखेर मूल्यवर्धित कर (व्हॅट) तसेच त्यावरील व्याज, शास्ती भरली नाही.
थकीत व्हॅट भरण्यासाठी नव महाराष्ट्र चाकणचे योगेश शेठ यांना 22 फेब्रुवारी व 9 जुलै 2024 रोजी आणि मदन बोरा यांना 24 जुलै 2024 रोजी नोटीस बजावली. त्यानंतरही त्यांनी कर भरणा केला नाही. त्यामुळे व्हॅट कायद्यातील कलमानुसार त्यांना ‘कारणे दाखवा’ नोटीस बजावण्यात आली. या नोटीस नोंदणीकृत ई-मेलवर बजावण्यात आली. नोटिसीबाबत त्यांनी कोणताही खुलासा केला नाही किंवा उत्तर दिले नाही.
नव महाराष्ट्र चाकणकडील थकीत व्हॅटचा भरणा करण्यासाठी शेठ आणि बोरा यांनी कोणताही प्रतिसाद दिला नसल्याने सांगलीचे राज्य कर निरीक्षक वैभव माने यांना गुन्हा दाखल करण्याचे आदेश दिले. त्यानुसार माने यांनी शेठ व बोरा यांच्याविरुद्ध कुपवाड एमआयडीसी पोलीस ठाण्यात फिर्याद दिली. 1 एप्रिल 2013 ते 31 मार्च 2017 या कालावधीत 14 कोटी 79 लाख 18 हजार 52 रुपयांचा व्हॅट चुकवल्याबद्दल गुन्हा दाखल करण्यात आला आहे.
