राज्यातील लाडक्या बहिणी, लाडके भाऊ, लाडके शेतकरी बंडलबाज सत्ताधाऱ्यांच्या फसवणुकीमुळे मोडून पडले आहेत. महाराष्ट्रावर कर्जाचा डोंगर असल्याचा साक्षात्कार या बंडलबाजांना आता झाला. या फुकटेगिरीमुळे राज्यात आर्थिक अराजक माजेल असे त्यांना आता वाटते, मग शेतकरी कर्जमाफीची आश्वासने देताना त्यांनी भांग ढोसली होती काय? तीन बंडलबाजांनी महाराष्ट्रातील शेतकऱ्यांवर ती वेळ आणली आहे, पण विष खायला या शेतकऱ्यांकडे पैसे नाहीत. बंडलबाज सरकारने शेतकऱ्यांना विषाची बाटली घेण्यासाठी तरी शंभर रुपयांचे कर्ज द्यावे!
फडणवीस, शिंदे आणि अजित पवार या त्रिकुटाने महाराष्ट्रात ‘अशी ही बनवाबनवी’ हा चित्रपट नव्याने पडद्यावर आणला आहे. महाराष्ट्राच्या आठ कोटी जनतेला या तिघांनी बेमालूम बनवले आहे. विधानसभा निवडणुकीपूर्वी दिलेल्या सर्व आश्वासनांना या तिघांनी हरताळ फासला आहे. निवडणूक प्रचारात शिंदे-फडणवीस यांनी जाहीर केले होते की, लाडक्या बहिणींना महिन्याला 2100 रुपये देऊ. शेतकऱ्यांचे 3 लाखांपर्यंतचे कर्ज माफ करू. या घोषणांमुळे बहिणी व भावांनी मते दिली. लाडक्या बेरोजगार भावांनाही आश्वासन दिलेच होते की, महिन्याला चार हजार रुपये खात्यात जमा करू. मात्र सत्तेत आल्यानंतर ‘आता ते शक्य नाही. योग्य वेळी बघू,’ असे या तिघांनी सांगून टाकले. या आश्वासनांवर काखा वर करून हे तिघे बंडलबाज महाराष्ट्रात फिरत आहेत. महिलांना 2100 रुपये देणे परवडणार नाही. महाराष्ट्रावर कर्जाचा डोंगर असल्याचे भाजपच्या मंत्र्यांनी सांगून टाकले. सरकारी पैशांनी बहिणींकडून मते विकत घेतली व आता त्यांना या ‘बंडलबाज’ भावांनी फसवले. शेतकऱ्यांच्या कर्जमाफीविषयी तीच फसवणूक झाली. उलट अजित पवार यांनी शेतकऱ्यांनाच आता दम भरला आहे. ‘31 मार्चच्या आधी कर्जाचा हप्ता भरा, थकबाकी भरा. नाहीतर जप्तीची कारवाई होईल,’ असा इशाराच त्यांनी दिला आहे. अजित पवारांना शेतकऱ्यांनी विचारले, ‘दादा, हे असे कसे म्हणता? कर्जमाफीचा वायदा तुम्ही लोकांनीच केला, मग आता मागे का जाता?’ यावर हे महाशय म्हणतात, ‘अरे वेड्या, माझ्या भाषणात तुम्ही कधी ऐकलं का कर्जमाफीचं? तुला माहितीय का, अंथरुण बघून हातपाय पसरायचे असतात.’ अजित पवारांचे ते विधान धक्कादायक आहे. शेतकऱ्यांना कर्जमाफीचे वचन फडणवीस-शिंद्यांनी दिले. भाजपच्या जाहीरनाम्यात
शेतकऱ्यांना कर्जमाफी देऊ
असे म्हटले आहे. त्याच सरकारचे पवार हे अर्थमंत्री आणि उपमुख्यमंत्री आहेत. अजित पवारांचे सरकार वेगळे नाही. ते जबाबदारी कशी झटकू शकतात? ही आश्वासने दिली तेव्हा राज्यात याच तीन बंडलबाज लोकांचे सरकार होते. शिंदे-फडणवीस कर्जमाफीचा धुरळा उडवीत असताना अजित पवारांनी त्यांना रोखलेही नाही आणि हे शक्य होणार नाही, असेदेखील बजावले नाही. शेतकऱ्यांचा सातबारा कोरा करू, चिंतामुक्त करू असे फडणवीस प्रत्येक भाषणात बोलत होते; पण फडणवीस यांनी शिंदे, अजित पवार, पटेलांचा ईडी, सीबीआयचा सातबारा कोरा करून त्यांना चिंतामुक्त केले. पटेल, अजित पवारांच्या शेकडो कोटींच्या इस्टेटी ईडीने जप्त केल्या. त्या या मंडळींनी सोडवून घेतल्या. शेतकरी जगला काय किंवा मेला काय, त्यांचे ते बघतील. पुन्हा या तीन बंडलबाजांत ताळमेळ नाही. अजित पवार म्हणतात, कर्जाची थकबाकी भरा. दुसरे शिंदे म्हणतात, ‘लाडक्या बहिणींनो व कर्जदार शेतकऱ्यांनो, चिंता करू नका. हा लाडका भाऊ सर्व आश्वासने पूर्ण केल्याशिवाय राहणार नाही’ तर तिसरा एकदम गोलमाल उत्तरे देऊन सटकतोय. एवढ्यावरच हे बंडलबाज सरकार थांबलेले नाही. ‘खर्चावर नियंत्रण करा आणि फुकट अनुदान योजना बंद करा,’ असे थेट आदेशच सर्व सरकारी विभागांना देण्यात आले आहेत. राज्याच्या मुख्य सचिवांचे हे परिपत्रक म्हणजे बंडलबाज तिघांनी जनतेच्या केलेल्या फसवणुकीवरील ‘सरकारी’ मोहोरच आहे. या फसवणुकीबद्दल या तिघांवर 420 कलमाखाली गुन्हा दाखल केला पाहिजे. जनतेची फसवणूक करून मते घेतली व आता लोकांसमोर जायला तयार नाही. या बंडलबाजांचे महागुरू श्री. मोदी यांनी उद्योगपती आणि धनिकांची साधारण साडेनऊ लाख कोटींची कर्जे माफ केली. त्यात अनिल अंबानी, जिंदालसारखे उद्योगपती आहेत; पण सामान्य शेतकऱ्यांचे कर्ज ते माफ करत नाहीत. महाराष्ट्रात शिवसेना, राष्ट्रवादी काँग्रेस पक्ष फोडून
आमदार व खासदार विकत घेण्यासाठी
तीन हजार कोटी खर्च झाले; पण शेतकऱ्यांच्या कर्जमाफीचा विषय काढला की यांची पळापळ होते. या बनवाबनवीस काय म्हणावे? महाराष्ट्रात शेतकऱ्यांच्या आत्महत्या वाढल्या आहेत. बंडलबाज तिघांचे सरकार आल्यापासून हजारांवर शेतकऱ्यांनी आत्महत्या केल्या. या शेतकऱ्यांची कुटुंबे उघड्यावर पडली. त्यांचा आक्रोश या बहिऱया सरकारच्या कानावर पडत नाही. कोणी कर्जाचा प्रश्न घेऊन दारात उभे राहिलेच तर ‘औरंगजेबाचे स्मरण करा, सर्व चिंता विसरून जाल. घरात कुदळ, फावडी असतीलच. ती घेऊन कबर खोदायच्या बेरोजगार हमीवर जा. हिंदुत्व धोक्यात आहे आणि तुला कर्जमाफी सुचतेय?’, असे सांगून शेतकऱ्यांनाच वेडे केले जाते. जात, धर्माच्या नशेत जनतेला गुंग केले तरी शेवटी विझलेल्या चुली केव्हातरी बंड करणारच. बंड करणाऱया शेतकऱयांना देशद्रोही ठरवून मारण्याची व्यवस्थाही या बंडलबाजांच्या सरकारने करून ठेवली आहे. राज्यातील लाडक्या बहिणी, लाडके भाऊ, लाडके शेतकरी बंडलबाज सत्ताधाऱ्यांच्या फसवणुकीमुळे मोडून पडले आहेत. महाराष्ट्रावर कर्जाचा डोंगर असल्याचा साक्षात्कार या बंडलबाजांना आता झाला. या फुकटेगिरीमुळे राज्यात आर्थिक अराजक माजेल असे त्यांना आता वाटते, मग शेतकरी कर्जमाफीची आश्वासने देताना त्यांनी भांग ढोसली होती काय? अजित पवार म्हणतात, ‘अंथरुण पाहून पाय पसरावे.’ शेतकऱ्यांकडे अंथरुणही नाही आणि पायात बळही नाही. तो कोसळून पडला आहे. तीन बंडलबाज व त्यांच्या भ्रष्ट टोळीचे पाय आणि अंथरुणही मोठेच आहे. पाय लांब केले तरी अंथरुण काही कमी पडत नाही. भ्रष्टाचाऱ्यांना कधीच काही कमी पडत नाही. कष्टकऱ्यांवर मात्र विष खाऊन मरण्याची वेळ येते. तीन बंडलबाजांनी महाराष्ट्रातील शेतकऱ्यांवर ती वेळ आणली आहे, पण विष खायला या शेतकऱ्यांकडे पैसे नाहीत. बंडलबाज सरकारने शेतकऱ्यांना विषाची बाटली घेण्यासाठी तरी शंभर रुपयांचे कर्ज द्यावे!
