महानगर गॅस लिमिटेडने (एमजीएल) सीएनजीच्या दरात किलोमागे दोन रुपयांची वाढ केली असून त्याची झळ मुंबईकरांच्या खिशाला बसणार आहे. मुंबईच्या उपनगरांत धावणाऱया रिक्षाच्या भाडेदरात वाढ होण्याची शक्यता आहे. रिक्षाच्या भाडेदरात प्रति किलोमीटर 2 ते 2.50 रुपयांची वाढ करण्याची मागणी रिक्षा युनियनने केली आहे. त्यामुळे मुंबईकरांचा रिक्षा प्रवास महागणार आहे.
महानगर गॅस लिमिटेडने 22 नोव्हेंबरपासून सीएनजीच्या दरात वाढ केली असून त्यानुसार आता प्रतिकिलो सीएनजीसाठी 75 ऐवजी 77 रुपये मोजावे लागत आहेत. मुंबईतील रिक्षा, टॅक्सी, बस यांसारखी सार्वजनिक परिवहन वाहने सीएनजीवर विसंबून असतात. त्यामुळे या वाहनांना सीएनजीसाठी अधिक पैसे मोजावे लागणार असून त्याचा भुर्दंड मुंबईकरांना सोसावा लागणार आहे. सार्वजनिक परिवहन वाहनांपैकी रिक्षाचालकांच्या युनियनने भाडेदरात दोन रुपयांची वाढ करण्याची मागणी पुढे रेटली आहे. सरकारने मान्यता दिलेल्या फॉर्म्युल्यानुसार रिक्षाच्या भाडे दरात प्रति किलोमीटर 2 ते 2.50 रुपयांची वाढ झाली पाहिजे, असे मुंबई रिक्षामन युनियनच्या एका वरिष्ठ नेत्याने सांगितले.
मुंबई शहरासह संपूर्ण मुंबई महानगर क्षेत्रात दहा लाखांहून अधिक वाहने सीएनजी इंधनावर चालतात. रिक्षापाठोपाठ टॅक्सी व इतर वाहनांच्या भाडेदरात वाढ होण्याची शक्यता आहे.
