महाराष्ट्र लोकसेवा आयोग (एमपीएससी) आणि जेएमएफसी यांनी घेतलेल्या दिवाणी न्यायाधीश कनिष्ठ स्तर व न्यायदंडाधिकारी प्रथम वर्ग परीक्षा 2022 चा निकाल जाहीर झाला असून, बीडची ऋचा विठ्ठल कुलकर्णी ही राज्यात पहिली आली आहे. विशेष म्हणजे पहिल्या दहा गुणवंतांमध्ये नऊ मुलींचा समावेश आहे.
कोरोनामुळे कनिष्ठ दिवाणी न्यायाधीश व न्यायदंडाधिकारी प्रथम वर्ग परीक्षा 2022ची परीक्षा लांबणीवर पडली होती. कोरोनानंतर 9 सप्टेंबर 2023ला पूर्ण परीक्षा झाली होती. 24 ऑगस्ट 2024 रोजी मेन (मुख्य) परीक्षा घेण्यात आली. त्यातील 343 उमेदवारांची मुलाखतींसाठी निवड झाली. 17 ते 29 मार्च या काळात मुलाखती पार पडल्या. शनिवारी अंतिम निकाल जाहीर झाला असून, 114 जणांची दिवाणी न्यायाधीश कनिष्ठ स्तर व न्यायदंडाधिकारी प्रथम वर्ग पदासाठी निवड करण्यात आली आहे.
पहिल्या दहा टॉपर्समध्ये नऊ मुली
या निकालाचे वैशिष्ट्य म्हणजे पहिल्या दहा टॉपर्समध्ये नऊ मुली आहेत. बीडची ऋचा विठ्ठल कुलकर्णीने पहिल्याच प्रयत्नात मोठे यश मिळविले. ऋचा कुलकर्णी राज्यात पहिली आली आहे. सायली संपत झांबरे हिने द्वितीय तर किरण संभाजी मुळीक हिने तिसरा क्रमांक पटकावला. त्यानंतर शिवाणी रामनाथ फाडोळ, तन्वी रहेमान शेख, सोनिया अविनाश गंधले, तनुज रमेश कुसारे, सुवर्णा विनायक शास्त्री, वंदना अरविंद चामले, किरण शांताप्रसाद वर्मा, विपुल एकनाथराव गुंजाळ, अनिकेत लिंबाराव कोकरे आदींची निवड झाली आहे.
गणेश शिरसाट अ‍ॅकॅडमीचे मोठे यश
दिवाणी न्यायाधीश कनिष्ठ स्तर व न्यायदंडाधिकारी प्रथम वर्गपदी राज्यातील 114 उमेदवारांची निवड झाली. त्यातील 90 उमेदवार पुण्यातील गणेश शिरसाट अ‍ॅकॅडमीचे विद्यार्थी आहे, असे अ‍ॅड. गणेश शिरसाट यांनी सांगितले. संयम आणि प्रामाणिक प्रयत्न केल्यास या स्पर्धा परीक्षेत यश मिळते. विद्यार्थ्यांनी अभ्यासाची शिस्त पाळणे गरजेचे आहे. परिक्षेची तयारी ते अंतिम निवड या संपूर्ण काळात सोशल मिडियापासून अलिप्त राहिले पाहिजे, असे शिरसाट यांनी सांगितले.
पहिल्याच प्रयत्नात स्वप्नपूर्तीचा आनंद – ऋचा कुलकर्णी
एलएलबीचे शिक्षण घेत असतानाच न्यायाधीश व्हायचे हे स्वप्न पाहिले होते. त्यासाठी अभ्यासात सातत्य ठेवले. पहिल्याच प्रयत्नात यश मिळाले. स्वप्न पूर्ण झाले याचा आनंद आहे. अ‍ॅड. गणेश शिरसाठ सर, आई-वडील, आजी यांचे प्रोत्साहान यामुळे हे यश मिळाले.
