यंदाच्या वर्षीचा अर्थसंकल्प सादर होण्याच्या काही तास आधी देशातील जनतेला मोठा दिलासा मिळाला आहे. गॅस सिलिंडरची किंमत सलग दुसऱ्या महिन्यात कमी करण्यात आली आहे. ही कपात व्यावसायिक गॅस सिलिंडरच्या किंमतीत करण्यात आली आहे. गेल्या दोन महिन्यांत व्यावसायिक गॅस सिलिंडरच्या किंमतीत 20 रुपयांहून अधिक घट झाली आहे. मात्र, मार्च 2024 पासून घरगुती गॅस सिलिंडरच्या किंमतीत कोणताही बदल झालेला नाही.
व्यावसायिक गॅस सिलिंडरच्या दरात सलग दुसऱ्या महिन्यात घट झाली आहे. मुंबई आणि चेन्नईमध्ये व्यावसायिक गॅस सिलिंडरची किंमत 6.5 रुपयांनी कमी झाली आहे. यानुसार मुंबईत 1,749.50 आणि चेन्नईमध्ये 1,959.50 रुपये इतकी किंमत झाली आहे. तसेच दिल्लीत घरगुती गॅस सिलिंडरची किंमत 7 रुपयांनी कमी झाली आहे. त्यामुळे आता त्याची किंमत 1,797 रुपये झाली आहे. कोलकातामध्ये किमान 4 रुपयांची घट झाली असून किंमत 1907 रुपये झाली आहे.
घरगुती गॅस सिलिंडरच्या दरात कोणताही बदल नाही
दरम्यान, घरगुती गॅस सिलिंडरच्या दरात कोणताही बदल झालेला नाही. मार्च 2024 मध्ये घरगुती गॅस सिलेंडरच्या किमतीत शेवटचा बदल झाला होता. सरकारच्या घोषणेनंतर IOCL ने घरगुती गॅस सिलेंडरची किंमत 100 रुपयांनी कमी केली होती. यानंतर घरगुती गॅस सिलिंडरच्या दरात कोणताही बदल झालेला नाही.
