नागराज मंजुळे यांनी दिग्दर्शित केलेल्या फॅंन्ड्री चित्रपटातून प्रेक्षकांच्या पसंतीत आलेले पात्र जब्या आणि शालूचा एका फोटो सोशल मीडियावर प्रचंड चर्चेचा विषय ठरत आहे. राजेश्वरी खरातने आपल्या इन्स्टाग्राम अकाउंटवर एक फोटो पोस्ट केला आहे. या फोटोमुळे राजेश्वरी आणि सोमनाथ अवघडे यांच्या लग्नाची चर्चा रंगली आहे. या फोटोकडे पाहून जब्या आणि शालू यांनी लगीनगाठ बांधली आहे का? असा प्रश्न पडला आहे.
या फोटोमध्ये सोमनाथ अवघडे आणि स्वत: राजेश्वरी दिसत आहेत. विशेष म्हणजे हे दोघेही लग्नमंडपात बसल्याचं दिसतंय. राजेश्वरी आणि सोमनाथच्या डोक्याला बाशिंग बांधले आहे. तसेच राजेश्वरीने पिवळी साडी परिधान केलेली आहे तर, सोमनाथ पांढऱ्या शुभ्र कपड्यांत दिसतोय. हा फोटो पाहून या दोघांचं मनोमिलन झालेलं असून ते लग्नाच्या बोहल्यावर चढले आहेत का? असं विचारलं जात आहे.
हा फोटो राजेश्वरी, सोमनाथच्या आगामी चित्रपटाचा भाग?
दरम्यान, याआधीही ही जोडी अनेकवेळा एकत्र दिसलेली आहे. दोघेही एकमेकांचे चांगले मित्र आहेत. त्यांनी आपापल्या इन्स्टाग्रामवर एकमेकांसोबतचे अनेक फोटो आणि रिल्स पोस्ट केलेले आहेत. त्यामुळेच या दोघांचा एकमेकांसोबतचा बॉण्ड पाहून त्यांनी लग्न केलंय का? अशी विचारपूस त्यांच्या चाहत्यांकडून केली जात आहे. खरं म्हणजे हा फोटो त्यांच्या आगामी चित्रपटाचा एक भाग आहे का? अशी शंकाही व्यक्त केली जात आहे. त्यामुळे या फोटोमागचा नेमका अर्थ काय? हे लवकरच स्पष्ट होणार आहे.
