पिंपरीत धक्कादायक घटना बुधवारी सकाळी उघडकीस आली आहे. किरकोळ वादातून लिव्ह इन पार्टनरचे महिलेची गळा आवळून हत्या केली. हत्या केल्यानंतर महिलेचा मृतदेह रिक्षात ठेवला आणि रिक्षा तिच्या आईच्या घराबाहेर पार्क केली. घटना उघड होताच परिसरात एकच खळबळ उडाली. शिवानी सुपेकर असे मयत महिलेचे नाव आहे. तर अनिल आवाळे असे आरोपीचे नाव आहे.
शिवानीच्या पतीचे काही वर्षापूर्वी निधन झाले आहे. तिला पहिल्या पतीपासून एक मुलगाही आहे. पतीच्या निधनानंतर शिवानी गेल्या दोन वर्षापासून अनिल आवाळे याच्यासोबत काळेवाडी परिसरात लिव्ह इन रिलेशनशीपमध्ये राहत होती.
मंगळवारी रात्री शिवानी आणि अनिलमध्ये किरकोळ कारणातून वाद झाला. हा वाद विकोपाला गेला आणि अनिलने शिवानीची गळा आवळून हत्या केली. हत्या केल्यानंतर शिवानीचा मृतदेह रिक्षात ठेवला आणि ती रिक्षा शिवानीच्या घराबाहेर पार्क केली. यानंतर आरोपी पळून गेला.
याप्रकरणी वाकड पोलीस ठाण्यात गुन्हा दाखल करण्यात आला आहे. वाकड पोलीस फरार आरोपीचा शोध घेत आहेत. दिवसेंदिवस वाढती गुन्हेगारी रोखण्याचे मोठे आव्हान पिंपरी-चिंचवड पोलिसांसमोर आहे.
