उधार औषधे दिली नाही म्हणून मेडिकल मालकावर चाकूने हल्ला केल्याची घटना पुण्यात घडली आहे. या हल्ल्यात मेडिकलचा मालक गंभीर जखमी झाला आहे. हडपसर येथील फुरसुंगी गावात ही घटना घडली. पोलिसांनी आरोपीला अटक केली आहे. मनोज अडागले असे अटक आरोपीचे नाव आहे.
फुरसुंगी गावातील आरोपी मनोज अडागले हा मंगळवारी एका मेडिकल स्टोरमध्ये औषधे आणायला गेला होता. त्याने काही औषधे घेतली. दुकानदाराने औषधांचे पैसे मागितले असता त्याने नंतर देतो असे सांगितले. मात्र दुकानदाराने उधार औषधे द्यायला नकार दिला. यामुळे मनोज संतापला आणि दुकानदाराला मारहाण करण्यास सुरवात केली.
यानंतर मनोजने शेजारच्या भाजीवाल्याकडील चाकू घेतला आणि दुकानदारावर हल्ला केला. यानंतर आरोपी पसार झाला. याप्रकरणी हडपसर पोलीस ठाण्यात गुन्हा दाखल करण्यात आला आहे. पोलिसांनी आरोपीला बेड्या ठोकल्या आहेत.
