भाजपची सत्ता असलेल्या पुण्यात विकास खचला आहे. शहरात मोठय़ा प्रमाणावर झालेल्या पावसामुळे ठिकठिकाणी रस्त्यांची चाळण झाली असून शहराच्या मध्यवर्ती भागात समाधान चौक सिटी पोस्ट आवारातील रस्त्याने चक्क संपूर्ण ट्रकच गिळंकृत केल्याची घटना घडली. पेव्हर ब्लॉकचा रस्ताच खचून ट्रक थेट खड्डय़ामध्ये कोसळल्यामुळे परिसरात घबराट उडाली होती. प्रसंगावधान राखून चालकाने ट्रकमधून उडी मारल्यामुळे त्याचा जीव वाचला आहे.
अग्निशमन दलाने दिलेल्या माहितीनुसार, लक्ष्मी रस्त्यावरील समाधान चौकानजीक असलेल्या सिटी पोस्ट आवारात महापालिकेची मैलापाणी वाहिनी दुरुस्ती करण्यासाठी ट्रकचालक जात होता. त्याच वेळी अचानकपणे ट्रक 25 फूट खड्डय़ात पडला. सुदैवाने या घटनेत जीवितहानी झालेली नसून चालकाने उडी मारल्याने तो बचावला आहे. दरम्यान, भलामोठा खड्डा नेमका कशामुळे पडला याची माहिती उपलब्ध झाली नाही. सिटी पोस्ट कार्यालय परिसरात मैलापाणी वाहिन्यांबाबत तक्रारी आल्याने महापालिकेकडून संबंधित वाहिन्या दुरुस्तीचे काम करण्यासाठी मैलापाणी वाहिनी दुरुस्ती ट्रक चालकाला पाठविण्यात आले होते.
