महसूल, पोलीस आणि वन विभागात नोकरीच्या आमिषाने फसवणूक करीत लाखो रुपये उकळणाऱ्या एकाला गुन्हे शाखा युनिट दोनच्या पथकाने अटक केली. आरोपी स्वतः महसूल सचिव असल्याचे सांगत होता. या आरोपीला बनावट नियुक्तिपत्रे बनवून देण्यामध्ये पुणे महसूल कार्यालयातील सहायक क्लार्कचा सहभाग निष्पन्न झाल्याने त्यालाही पोलिसांनी अटक केली. यामुळे एकच खळबळ उडाली आहे.
महादेव बाबूराव दराडे (32, रा. वाकड, मूळ. रा. धाराशिव) आणि रणजीत लक्ष्मण चौरे (35, रा. धायरी. मूळ. रा. बीड) अशी अटक करण्यात आलेल्यांची नावे आहेत. यातील चौरे हा पुणे महसूल कार्यालयात सहायक क्लार्क म्हणून कामाला आहे. एका 22 वर्षीय तरुणाने बंडगार्डन पोलीस ठाण्यात दिलेल्या फिर्यादीनुसार दराडे याच्यावर 10 लाख रुपये घेऊन फसवणूक केल्याप्रकरणी गुन्हा दाखल आहे.
पोलिसांनी दिलेल्या माहितीनुसार, आरोपी दराडे हा रिअल इस्टेट एजंट म्हणून काम करतो. कामानिमित्ताने शासकीय कार्यालयात ये-जा असल्याने तो अनेकांना महसूल सचिव असल्याचे सांगत होता. फिर्यादीची एकाच्या माध्यमातून दराडे याच्याशी ओळख झाली. त्यानंतर दराडेने तरुणाचा विश्वास संपादित करून तरुणाला पोलीस उपनिरीक्षक पदावर नियुक्ती देतो, असे सांगून 2022 ते 25 या तीन वर्षांत वेळोवेळी दहा लाख रुपये घेतले. या गुन्ह्याचा तपास गुन्हे शाखेकडून सुरू होता. दरम्यान, पोलीस अंमलदार उज्वल मोकाशी यांना मिळालेल्या माहितीनुसार दराडे याला पथकाने अटक केली. त्याची चारचाकी गाडी तसेच वाकड येथील घरातून पोलिसांना बनावट कागदपत्रे सापडली. अनेक नियुक्तिपत्रे, लेटरपॅड, शिक्के मिळाले आहेत. या पद्धतीने दराडे याने राज्यातील पंधरा ते वीसजणांची फसवणूक केल्याची शक्यता आहे. या गुन्ह्यात दराडे याला चौरे हा बनावट नियुक्तिपत्रे बनवून देण्यात मदत करीत असल्याचे निष्पन्न झाले. त्यानुसार पोलिसांनी चौरे यालाही अटक केली. अपर पोलीस आयुक्त शैलेश बलकवडे, उपायुक्त निखिल पिंगळे, सहायक आयुक्त गणेश इंगळे यांच्या मार्गदर्शनाखाली युनिट दोनचे पोलीस निरीक्षक प्रताप मानकर, सहायक निरीक्षक अमोल रसाळ, अंमलदार शंकर नेवसे, उज्वल मोकाशी, पुष्पेंद्र चव्हाण, विनोद चव्हाण, राहुल शिंदे, नागेश राख, संजय जाधव, विजय पवार यांच्यासह पथकाने ही कामगिरी केली.
20 ते 25 जणांच्या फसवणुकीची शक्यता
दराडे याने महसूल सचिव अशी ओळख सांगून राज्यभरातील 20 ते 25 जणांची फसवणूक केल्याची प्राथमिक शक्यता आहे. त्याच्याकडून पोलीस, वन आणि महसूल विभागाची बनावट नियुक्तिपत्रे, शिक्के, लेटरपॅड आदी कागदपत्रे पोलिसांनी जप्त केली आहेत. त्यामुळे आणखी माहिती समोर येण्याची शक्यता आहे.
आरोपींकडून अनेक कागदपत्रे जप्त करण्यात आली आहेत. प्राथमिक तपासात त्याने अशाप्रकारे राज्यातील आणखी काहीजणांची फसवणूक केल्याची शक्यता आहे. कुणाची फसवणूक झाली असल्यास त्यांनी पोलिसांशी संपर्क करावा.
– प्रताप मानकर, पोलीस निरीक्षक, युनिट दोन.
