अहिल्यानगर येथील न्यू आर्ट्स, कॉमर्स अँड सायन्स कॉलेजमधील संज्ञापन अभ्यास विभागाच्या वतीने दरवर्षी आयोजित करण्यात येणाऱ्या प्रतिबिंब या चित्रपट, लघुपट व माहितीपट महोत्सवाला सुरुवात होत आहे. चित्रमहर्षी दादासाहेब फाळके यांच्या स्मृती दिनानिमित्त 15 ते 18 फेब्रुवारी दरम्यान या महोत्सवाचे आयोजन करण्यात येते.
यावर्षीच्या चित्रपट महोत्सवाची थीम ‘रहस्य’ ही असून, देश-विदेशातील विविध भाषांतील चित्रपट पाहण्याची संधी मिळणार आहे. याबरोबरच देशभरातून स्पर्धेसाठी आलेले लघुपट व माहितीपट पाहाता येणार आहेत. तसेच, राष्ट्रीय स्तरावरील छायाचित्र स्पर्धेचेही आयोजन करण्यात आले असून, तेही पाहण्यासाठी सर्वांसाठी चार दिवस खुले राहणार आहे. हा चित्रपट महोत्सव सर्वांसाठी खुला व मोफत असून, रसिकांनी त्याचा आवर्जून लाभघ्यावा, असे आवाहन महाविद्यालयाचे प्राचार्य डॉ. बाळासाहेब सागडे यांनी केले आहे.
15 फेब्रुवारी रोजी सकाळी 9 वाजता महाविद्यालयाचे प्राचार्य डॉ. बाळासाहेब सागडे यांच्या हस्ते प्रतिबिंब चित्रपट महोत्सव व फोटोग्राफी महोत्सवाचे उद्घाटन होणार आहे. त्यानंतर सकाळी 10 वाजता ‘अंदाधुंद’ या चित्रपटाने महोत्सवाची सुरुवात होणार आहे. त्यानंतर दुपारी द ग्रीन माईल व संध्याकाळी शटर आयलँड हे चित्रपट दाखविण्यात येणार आहेत.
16 फेब्रुवारी रोजी सकाळी प्रसिद्ध दिग्दर्शक दिवंगत श्याम बेनेगल यांच्या स्मरणार्थ ‘अंकुर’ हा चित्रपट दाखविण्यात येईल. त्यानंतर दुपारी 1 वाजल्यापासून स्पर्धेतील माहितीपट व संध्याकाळी 6 वाजल्यापासून लघुपट दाखविण्यात येतील. 17स्पर्धेतील विद्यार्थी व खुल्या गटातील लघुपटांचे प्रदर्शन होईल. 18 फेब्रुवारी रोजी सकाळी 9 वाजल्यापासून उर्वरित लघुपट स्पर्धा पार पडेल. दुपारी 2 वाजल्यापासून उपस्थितांना परीक्षकांशी संवाद साधता येईल. या चारही दिवस हा महोत्सव पाहण्यासाठी दररोज सकाळी 9 ते रात्री 9 या दरम्यान खुला असेल. शहरातील रसिकांनी या महोत्सवास अवश्य भेट द्यावी, असे आवाहन संज्ञापन अभ्यास विभागातर्फे करण्यात आले आहे.
