चंद्रपूर-आर्णी लोकसभा क्षेत्राच्या काँग्रेसच्या विजयी उमेदवार प्रतिभा धानोरकर यांचा जाहीर सत्काराचा कार्यक्रम गुरुवारी राजुरा येथे पार पडला. या सत्कार सोहळ्यात प्रतिभा धानोरकर यांनी भाजपला चंद्रपूर लोकसभा क्षेत्रातून हद्दपार करण्याचा निर्धार केला. ”येणाऱ्या विधानसभा निवडणुकीत मी स्वतः विधानसभा क्षेत्राची उमेदवार म्हणून प्रचार करेल. माझ्या लोकसभा क्षेत्रातील सहा विधानसभा क्षेत्रात भाजपाचा सुपडा नाही साफ केला तर प्रतिभा धानोरकर नाव लावणार नाही” अशी गर्जना धानोरकर यांनी केली.
पुढे धानोरकर म्हणाल्या, या क्षेत्राची खासदार म्हणून विधानसभेची उमेदवारी मला वाटायची आहे. आमदारकीचे तिकीट मी सुभाष धोटे यांना देईनच मात्र सोबत त्यांना मंत्री पद मिळेल यासाठी प्रयत्न करेन. मला तिकीट मिळू नये यासाठी माझ्या पक्षातील काहींनी प्रयत्न केला. आमदार सुभाष धोटे यांना सुपारी देण्याचा प्रयत्नही झाला. सुधीर मुनगंटीवार घरी बसल्या निवडून येतील अशी प्लानिंग केली गेली. मात्र आमदार धोटे अमिषाला बळी पडले नाहीत. अगदी सुरवाती पासून माझ्या सोबतीला धोटे खंबीरपणे उभे होते. गडचिरोली जिल्ह्याला मंत्री पद मिळत असते. यावेळी चंद्रपूरला मंत्रीपद मिळेल यासाठी मी प्रयत्न करणार, असं धानोरकर म्हणाल्या.
