वजनी गटाच्या ग्लॅमरस आणि पीळदार शरीरसौष्ठवपटूंच्या जमान्यातही आपल्या उंचीच्या खेळाने शरीरसौष्ठव खेळात उंचीवर असलेल्या हौशी शरीरसौष्ठव संघटनेने येत्या रविवारी अर्थातच 6 एप्रिलला काळाचौकीच्या अभ्युदयनगरात ‘पसायदान श्री’ राज्यस्तरीय शरीरसौष्ठव स्पर्धेचे आयोजन केले आहे. आजच्या युवा पिढीमध्ये शारीरिक स्वास्थ्य आणि व्यायामाविषयी जागरूकता निर्माण करण्याच्या ध्येयानेच पसायदान मुंबईने अभ्युदयनगरच्या शहीद भगतसिंह मैदानावर या स्पर्धेचे आयोजन केले आहे.
हौशी शरीरसौष्ठव संघटनेचे सचिव नंदपुमार तावडे यांनी ‘पसायदान श्री’ स्पर्धेत मुंबईच नव्हे तर राज्यातील हौशी शरीरसौष्ठवपटू मोठ्या संख्येने सामील व्हावेत म्हणून जोरदार प्रयत्न केले आहेत. एपूण चार उंची गटात खेळल्या जाणाऱ्या या स्पर्धेत अव्वल सात खेळाडूंना प्रत्येकी 7, 6, 5, 4, 3, 2, 1 हजार अशी रोख बक्षिसे देऊन गौरविले जाणार आहे. प्रत्येक गटातील अव्वल तीन खेळाडूंना पदकेही प्रदान केली जाणार आहेत. चार गटातून अव्वल आलेल्या खेळाडूंमध्ये चॅम्पियन्सचा मान मिळवणारा शरीरसौष्ठवपटू ‘पसायदान श्री’चा मानकरी ठरेल. त्याला रोख 21 हजार रुपयांचे इनाम दिले जाणार असल्याची माहिती पसायदानच्या अध्यक्षा रुपाली काणकोणकर यांनी दिली.
उंची गटाच्या संघटनेला वजनी गटाच्या संघटनेचीही साथ
शरीरसौष्ठवाचे ग्लॅमर पाहून या खेळात अनेक संघटनांच्या नावाखाली दुकानं सुरू झाली आहेत. मात्र शरीरसौष्ठवपटूंना प्रोत्साहन मिळावे म्हणून महाराष्ट्र शरीरसौष्ठव संघटनेचे सचिव सुरेश कदम यांनी पुढाकार घेतला असून त्यांच्या वजनी गटातील दमदार आणि पीळदार खेळाडूसुद्धा या स्पर्धेत उतरून एक नवा पायंडा पाडणार आहेत. संघटनांच्या वादात खेळाडूंचे नुकसान होऊ नये म्हणून आपल्या वजनी गटातील खेळाडूंना उंचीच्या या स्पर्धेत उतरण्याचे आवाहन केल्याची माहिती कदम यांनी दिली. ही स्पर्धा पाहून मुंबईतील अन्य संघटनांनीही आपापसातील हेवेदावे विसरून खेळाडूंना सर्व संघटनांच्या स्पर्धांमध्ये खेळण्याची विनाअट परवानगी द्यावी, असे आवाहनही सर्व शरीरसौष्ठव संघटनांना केले आहे.
