जम्मू कश्मीरमधील पहलगाम येथे दहशतवाद्यांनी केलेल्या भ्याड हल्ल्यात अनेक निष्पाप पर्यटकांनी आपला जीव गमावला. या घटनेमुळे संपूर्ण देश हादरला आहे. दरम्यान आता या हल्ल्याबाबत नवीन माहिती समोर येत आहे. बुधवारी या हल्ल्यातील दहशतवाद्यांचे छायाचित्र व्हायरल झाले. यानंतर आता कश्मीरमध्ये आलेल्या पर्यटकांधील महिलांसोबत गैरवर्तन केल्याचे प्रकरणही समोर आले आहे. यासंदर्भात जौनपूरची रहिवाशी, मॉडेल एकता तिवारी हिने पोस्ट शेअर करत भयंकर अनुभव सांगितला आहे.
जौनपूरची रहिवाशी एकता तिवारी आपल्या कुटुंबासह कश्मीरमध्ये फिरण्यासाठी आली होती. 13 एप्रिल रोजी ती तिच्या कुटुंबासह जौनपूरहून वैष्णोदेवी यात्रेसाठी निघाली होती. यानंतर 16 एप्रिल रोजी ती श्रीनगरला आली आणि तिथून ती श्रीनगरमधील सोनमर्गला भेट देण्यासाठी निघाली. 20 एप्रिल रोजी, पहलगाममध्ये पोहोचली.यावेळी तिला आलेले भयंकर अनुभव तिने सोशल मीडियावर शेअर केले आहेत. तिने पहलगाम येथील खेचर मालकाने तिच्याशी गैरवर्तन केल्याचा आरोप केला.
खेचर मालकाचा संबंध एखाद्या दहशतवादी टोळीशी असू शकतो, असा संशय एकताने व्यक्त केला. तेथील एका खेचर मालकाचे वर्तन आम्हाला विचित्र वाटले. त्याच्याकडे एक छोटा फोन होता आणि तो फोन वारंवार बाहेर काढायचा आणि कोणाशी तरी बोलल्यानंतर तो त्याच्या बुटांमध्ये लपवायचा. यावेळी एकताने या खेचर मालकाला फोनवर बोलताना एकले होते. बंदुका पाठवल्या आहेत, पण ब्रेक फेल झाले नाहीत, असे तो कोणालातरी वारंवार फोनवर सांगत होता. त्यामुळे आम्ही घाबरलो होतो. मात्र ज्यावेळी तिला संशय आला तेव्हा तिने खेचर चालकाचा फोटो आणि व्हिडिओ मोबाईलमध्ये रेकॉर्ड केला. आणि ती घटनास्थळावरून निघून गेली, असे तिने सांगितले.
एवढेच नाही तर तेथील अनेक पर्यटंकांना तुम्ही लोक कुराण का वाचत नाही, असे म्हणत शिवीगाळ केली. यानंतर माझ्या भावाने रुद्राक्ष घातल्याबद्दल त्यालाही वाईट वागणूक देण्यात आली. एकताने ही घटना सोशल मीडियावर शेअर केली आहे. त्यामुळे नेटकऱ्यांमध्ये संतापाची लाट उसळली आहे.
एकता तिवारी 2016 पासून जयपूर, राजस्थान येथील स्टेट बँक ऑफ इंडियाच्या प्रेमनगर दौसा शाखेच्या शाखा व्यवस्थापक आहे. 2020 मध्ये नोकरी सोडल्यानंतर, ती 2023 मध्ये जौनपूरमधील मौर्य मार्केटमध्ये राहू लागली. तिचे पती प्रशांत तिवारी हे जल निगममधील जल जीवन मिशनचे वरिष्ठ अभियंता आहेत.
