काँग्रेसचे विरोधी पक्षनेते विजय वडेट्टीवार यांनी मुख्यमंत्री एकनाथ शिंदेंवर टीकेची तोफ डागली आहे. महाराष्ट्र विकणाऱ्या मुख्यमंत्र्यांमध्ये एकनाथ शिंदे यांचं नाव सर्वात वर असेल, असे वक्तव्य करत वडेट्टीवार यांनी शिंदेंचा समाचार घेतला आहे. शिंदेंसह देवेंद्र फडणवीस आणि अजित पवार यांच्यावरही वडेट्टीवार यांनी हल्लाबोल केला आहे.
महाराष्ट्राच्या सत्तेच्या खुर्चीत महाराष्ट्र विकणारी मंडळी बसली आहेत. कुंपणच शेत खातंय हे महाराष्ट्र बघतोय. एकनाथ शिंदे यांच्या नेतृत्वाखाली सरकारने कधी नव्हे एवढ्या जमिनी विकण्याचा सपाटा लावला आहे. महाराष्ट्र विकणारा मुख्यमंत्री कोण यावर उद्याचा इतिहास जेव्हा लिहिला जाईल तेव्हा एकनाथ शिंदे यांचे नाव सर्वात वर असेल, अशी टीका वडेट्टीवार यांनी केली आहे.
‘देवेंद्र फडणवीस तिकडे फडफड करत आहेत’, असेही वडेट्टीवार यांनी म्हटले आहे. तर अजित पवार यांच्याबाबत भाजपने वापरा आणि फेका नीती वापरली आहे, असे म्हणत वडेट्टीवार यांच्या भाजपच्या कुटिल राजकारणावर टीका केली आहे.
