मोमोज खाल्ल्यानंतर एका महिलेचा मृत्यू झाल्याची घटना हैदराबादमध्ये उघडकीस आली आहे. तर अन्य 50 जण आजारी पडले आहेत. रेश्मा बेगम असे मयत महिलेचे नाव आहे. याप्रकरणी बंजारा हिल्स पोलीस ठाण्यात गुन्हा दाखल करण्यात आला आहे. पोलिसांनी मोमोज विक्री करणाऱ्या दोघांना अटक केली आहे.
हैदराबाद येथील बंजारा हिल्समधील खाद्यपदार्थांच्या स्टॉलवर रेश्मा बेगम, तिची मुले आणि सिंगाडाकुंटा बस्तीच्या इतर अनेक लोकांनी शुक्रवारी मोमोज खाल्ले. मोमोज खाल्ल्यानंतर शनिवारी सर्वांना उलट्या आणि जुलाब सुरू झाले. यानंतर सर्वांना विविध रुग्णालयात दाखल करण्यात आले.
उपचारादरम्यान रेश्मा बेगम हिची प्रकृती खालावल्याने तिला निजाम्स इन्स्टिट्यूट ऑफ मेडिकल सायन्सेस (NIMS) येथे हलवण्यात आले. मात्र उपचारादरम्यान तिचा मृत्यू झाला. मोमोजमधील मेयोनिज आणि चटणीमुळे विषबाधा झाल्याचा पोलिसांना संशय आहे. याप्रकरणी सखोल तपास पोलीस करत आहेत.
