‘ना भय, ना भ्रष्टाचार’, ‘नको बारामती, नको भानामती’ अशा वल्गना करून भाजपने महापालिका आणि नंतर भोसरी विधानसभा मतदारसंघ जिंकला. मात्र, महापालिकेच्या पाच वर्षांच्या सत्ता काळात आणि भाजप आमदाराच्या दहा वर्षांच्या कार्यकाळात महापालिकेतील प्रत्येक कामात रिंग आणि भ्रष्टाचार सुरू आहे. याबाबत वेळोवेळी आवाज उठवत आंदोलने, मोर्चे काढले. वेळप्रसंगी न्यायालयात गेलो. यानंतर भाजपच्या भ्रष्टाचाराला अंकुश बसेल, अशी अपेक्षा होती. मात्र, तसे काही घडले नाही. त्यामुळे भोसरी विधानसभा मतदारसंघाच्या अधोगतीला भाजप आमदारच जबाबदार असल्याचा हल्लाबोल राष्ट्रवादी काँग्रेस शरदचंद्र पवार पक्षाचे नेते अजित गव्हाणे यांनी गुरुवारी (दि. 18) निगडी येथे आयोजित पत्रकार परिषदेत केला.
आगामी विधानसभा निवडणुकीच्या पार्श्वभूमीवर ज्येष्ठ नेते शरद पवार यांच्या उपस्थितीत शहर राष्ट्रवादी काँग्रेस शरदचंद्र पवार पक्षाच्या वतीने उद्या शनिवारी (दि.20) पिंपरीगावातील नवमहाराष्ट्र महाविद्यालयाच्या मैदानावर सायंकाळी पाच वाजता विजयी संकल्प मेळाव्याचे आयोजन केले आहे. या मेळाव्याची माहिती देण्यासाठी आयोजित केलेल्या पत्रकार परिषदेला शहराध्यक्ष तुषार कामठे, महिला शहराध्यक्षा ज्योती निंबाळकर, युवक अध्यक्ष इम्रान शेख, माजी नगरसेवक विनायक रणसुभे, पंकज भालेकर, धनंजय भालेकर, विशाल जाधव आदी पदाधिकारी उपस्थित होते.
शहराध्यक्ष तुषार कामठे म्हणाले, आगामी विधानसभा निवडणुकीपूर्वी शहरात ज्येष्ठ नेते शरद पवार मेळाव्यासाठी येत आहेत. त्यामुळे महाविकास आघाडीच्या कार्यकर्त्यांमध्ये उत्साहाचे वातावरण आहे. शहराच्या विकासात शरद पवार यांचे मोठे योगदान आहे. पवार यांना भक्कम साथ देणाऱ्या 85 जुन्या सहकाऱ्यांचा, पक्षाच्या नवनिर्वाचित आठ खासदारांचा सन्मान यावेळी केला जाणार आहे. लोकसभा निवडणुकांदरम्यान लोकशाहीला वाचविण्यासाठी, संविधान रक्षण करण्याच्या दृष्टीने महाराष्ट्रभर निर्भय बनो चळवळीच्या माध्यमातून जनजागृती करून मोलाचे योगदान देणारे अॅड. असीम सरोदे, विश्वंभर चौधरी, ज्येष्ठ पत्रकार संजय आवटे यांचाही सन्मान करण्यात येणार आहे.
भाजपचे अनेक माजी नगरसेवक संपर्कात
आगामी विधानसभा निवडणुकीच्या पार्श्वभूमीवर भोसरी मतदारसंघातील माजी नगरसेवकांचा राष्ट्रवादी काँग्रेस शरदचंद्र पवार पक्षात प्रवेश झाला आहे. पिंपरी आणि चिंचवड या दोन्ही मतदारसंघातील भाजपसह इतर पक्षातील माजी नगरसेवक, पदाधिकारी लवकरच प्रवेश करणार आहेत. भोसरीतील भाजपचे अनेक माजी नगरसेवक आमदारांच्या कारभाराला कंटाळले आहेत. यातील सात ते आठजण उघड विरोधाची भूमिका घेत आहेत. या माजी नगरसेवकांसह भाजपचे अनेक माजी नगरसेवक संपर्कात असल्याचा दावा अजित गव्हाणे यांनी केला. भोसरी विधानसभा मतदारसंघात शिवसेना (उद्धव बाळासाहेब ठाकरे) पक्षाच्या एखाद्या पदाधिकाऱ्याला उमेदवारी दिली तरी आपण त्या उमेदवाराचे प्रामाणिकपणे काम करू. तसेच माजी आमदार विलास लांडे हे जरी उपमुख्यमंत्री अजित पवार यांच्या बैठकीला गेले तरी ते आपल्याच पाठीशी असल्याचा दावा त्यांनी केला.
