झारखंड पोलिसांनी छत्र जिल्ह्यातील दुलकी नदीजवळील जंगलात कारवाई करत तीन नक्षलवाद्यांना अटक केली आहे. अटक केलेल्या नक्षलवाद्यांकडून दोन देशी बनावटीचे पिस्तूल, एक रिव्हॉल्व्हर आणि पाच जिवंत काडतुसे जप्त करण्यात आले आहे. तिघेही नक्षलवादी टीएसपीसीचे सक्रिय सदस्य होते.
दुलकी नदीजवळील जंगलात काही नक्षलवादी लपून बसले असल्याची गुप्त माहिती पोलिसांना मिळाली होती. त्याआधारे बुधवारी पोलिसांनी परिसरात छापेमारी करत तीन नक्षलवाद्यांना अटक केल्याचे छत्राचे एसपी विकास पांडे यांनी सांगितले.
विकास कुमार यादव, गुड्डू यादव आणि तस्लीम अन्सारी अशी अटक केलेल्या नक्षलवाद्यांची नावे आहेत. हे सर्वजण काहीतरी घातपात घडवण्याच्या तयारीत होते, असा पोलिसांना संशय असून, त्यांची चौकशी सुरू आहे.
